Petkat e priftërinjve, Shpinorja, etj.

¹»Prej bijve të Izraelit merre pranë teje Aronin, vëllanë tënd, me bijtë e tij që të ushtrojnë priftërinë për mua: Aroni, Nadabi, Abiuhi, Eleazari dhe Itamari.

²Puno për Aronin, vëllanë tënd, petkat e shenjta që të paraqesin nderin dhe madhërinë.

³Thuaju të gjithë mjeshtërve që i kam pajisur me dije që t’ia punojnë petkat Aronit që të kushtohet në shërbesën e priftërisë sime.

⁴Dhe ja, petkat që duhet t’i punojnë: parzmorja, shpinorja, guna, këmisha e qendisur, kësula dhe brezi. Le t’i punojnë petkat e shenjta për Aronin e për bijtë e tij që të kryejnë shërbesën priftërore në nder tim.

⁵Ata le të përdorin ar, pëlhurë ngjyrë viollce, të kuqe, të kuqe të mbyllur dhe li të tjerrë.«

⁶»Shpinoren le ta punojnë prej arit, me pëlhurë ngjyrë vjollce, të kuqe e të kuqe të mbyllur dhe me li të dredhur - të punuar me mjeshtri.

⁷Le t’i ketë dy krahëza dhe në dy anët e skajeve të saja të bashkohet me to.

⁸Rrypi që është mbi të për ta shtrënguar duhet të jetë i të njëjtës përmbajtje dhe një tërësi me të: prej arit, pëlhure ngjyrë vjollce, të kuqe e të kuqe të mbyllur dhe me li të dredhur.

⁹Merri dy gurë të paçmueshëm alabastri dhe gdhendi në ta emrat e bijve të Izraelit:

¹⁰gjashtë emra në njërin gur e gjashtë tjerët në gurin tjetër, sipas rendit të lindjes së tyre.

¹¹Gdhendi gurët me mjeshtrinë e gdhendësit të gurëve e zgavroj emrat e bijve të Izraelit ashtu si skalitet vula; përreth tyre vëri rreth ari.

¹²Nguli dy gurët mbi krahëzat e shpinores që të jenë në përkujtim të bijve të Izraelit. Kështu Aroni le t’i mbarë para Zotit emrat e tyre mbi të dy krahët për t’i përkujtuar.

¹³Edhe skajet punoj prej arit

¹⁴dhe dy vargje prej arit të pastër në trajtë të tejes me mjeshtri gërshetimi e atëherë mbërthej vargjet me skajet e arta.

¹⁵»Punoje edhe parzmoren e gjykimit me mjeshtri, sipas punimit të shpinores me ari, me pëlhurë ngjyrë vjollce, të kuqe e të kuqe të mbyllur dhe me li të dredhur:

¹⁶le të jetë katrore dhe e dyfishtë: një pëllëmbë gjatë e një pëllëmbë gjerë.

¹⁷Vëri në të katër radhë gurësh: në rreshtin e parë vër gurin: rubin, topaz e smaragd.

¹⁸Në rreshtin e dytë: karbunkullin, safirin e jaspisin.

¹⁹Në rreshtin e tretë: hiacintin, ahatin e ametistin.

²⁰Në të katërtin: krisolitin, oniksin e berilin. Le të jenë të rrethuar me ari sipas radhës së tyre.

²¹Le t’i kenë emrat e bijve të Izraelit: le të jenë të gdhendur dymbëdhjetë emrat: çdo gur emrin e njërit nga të dymbëdhjetë fiset.

²²Edhe parzmores punoja vargjet si teje të gërshetuar me mjeshtri, ari të pastër.

²³Po edhe dy rrathë ari e vëri në majë të dy anëve të parzmores.

²⁴Vargjet e arta mbërthej me rrathët që janë në rrethin e saj,

²⁵kurse dy majët e këtyre vargjeve mbërthej në rrethin e krahëzave të shpinores në pjesët e përparme.

²⁶Punoji edhe dy rrathë të artë dhe lidhi për dy këndet e poshtme të parzmores në buzë përbrenda që është e sjellë prej shpinores.

²⁷Punoji po ashtu edhe dy rrathë të tjerë ari që do të vihen në secilin rryp të poshtëm të shpinores në pjesën e përparme të saj aty ku përpiqet rrypi i shpinores

²⁸e shtërngoje parzmoren për rrathët e saj e për rrathët e shpinores me një shirit purpure ngjyrë vjollce, kështu që parzmorja të rrijë përmbi rrypin e shpinores që parzmorja e shpinorja të mos mund të ndahen.

²⁹Kështu, pra, Aroni sa herë që të hyjë në Shenjtërore, le t’i mbartë mbi zemrën e vet emrat e fiseve të bijve të Izraelit në parzmoren e gjykimit: që t’i përkujtojë gjithmonë para Zotit.

³⁰Vëri në parzmoren e gjykimit edhe ‘Urim e Tummim’, që të jenë edhe ata mbi zemrën e Aronit sa herë që të hyjë në praninë e Zotit. Kështu Aroni ta mbarë mbi zemrën e vet në praninë e Zotit përherë gjykimin e bijve të Izraelit.«

³¹»Gunën e shpinores punoje të tërë prej pëlhure të ngjyrës vjollce,

³²e në mes të saj grykën për krye. Buza përreth le të qepet porsi gryka në pancir, që të mos shqyhet.

³³Kurse në fund të gunës, gjithkund përreth, punoji prej pëlhurës ngjyrë vjollce, të kuqe e të kuqe të mbyllur si shega e ndërmjet shegave kumbonëzat ari,

³⁴kështu që të jetë një kumbonëz e një shegë e një kumbonëz e një shegë.

³⁵Le të veshet me të Aroni kur kryen shërbesën që të dëgjohet tingëllima kur hyn e del prej shenjtërores kështu s’do të vdesë.«

³⁶»Punoje edhe një paftë krejt ari të kulluar e në të zgavroje ashtu si zgavrohet në vulën e unazës: »I shuguruar Zotit«.

³⁷Lidhe me shirit ngjyrë vjollce për kësulë,

³⁸në ballin e Aronit. Kështu Aroni le t’i marrë mbi vete të gjitha mungesat që do të mund t’i njollosnin kushtet e dhuratat që izraelitët i kushtojnë. Le ta mbajë gjithmonë në ballë që të fitojë për ta përkrahjen e Zotit.

³⁹Punoja këmishën prej lirit të pastër; po ashtu edhe kësulën prej lirit të pastër; edhe brezin të qendisur me mjeshtri.«

⁴⁰»Po edhe për bijtë e Aronit punoj këmisha të linjta; punoji edhe breza dhe kësula në shenjë nderi e madhërie.

⁴¹Veshe me to Aronin, vëllanë tënd, dhe bijtë e tij; atëherë lyej me vaj, mbushjau duart me pushtet dhe shuguroj që ta kryejnë shërbesën priftërore në nderim tim.

⁴²Punoju edhe të linjtat që të mbulojnë veten qysh prej veshkëve e deri kofshët.

⁴³Le t’i mbarin Aroni e bijtë e tij kur hynë në Tendën e takimit ose kur i afrohen lterit për të kryer shërbesën në shenjtërore që të mos bien në faj e të vdesin: është urdhëresë rituale e përhershme për të dhe për pasardhësit e tij pas tij.«