Profeci mbi malet e Izraelit

¹»Tashti, biri i njeriut, profetizo mbi bjeshkët e Izraelit e thuaj: Bjeshkët e Izraelit, dëgjoni fjalën e Zotit.

²Kështu thotë Zoti Hyj: Meqenëse tha armiku juaj për ju: ‘Ah! Ah! Bjeshkët e amshueshme u bënë prona jonë’!

³Prandaj profetizo e thuaj: Kështu thotë Zoti Hyj: Pasi keni qenë shpartalluar e përndjekur prej fqinjëve tuaj për t’u bërë pronë e popujve të tjerë e pasi u bëtë përralla e gjuhëve shpifëse e shenjë turpi për popullin,

⁴prandaj, o malet e Izraelit, dëgjojeni fjalën e Zotit: Kështu u thotë Zoti Hyj maleve, kodrave, përrenjve e vërrive, vendeve të shkretuara e qyteteve të mbetura shkretë, që u shpopullzuan e u bënë shenjë përqeshjeje për popujt e tjerë përreth.

⁵Mirë, pra, kështu thotë Zoti Hyj: Me felgrim të ndezur flakë po përbetohem kundër popujve të tjerë e kundër mbarë Idumit, që e morën tokën time për pronë të veten, me gëzim e me gjithë zemër e me gjithë shpirt të lig që t’i përmbysin kullotat e tija.

⁶Prandaj, parafol për tokën e Izraelit e thuaju maleve, kodrave, përrenjve e luginave: Kështu thotë Zoti Hyj: Ja, po përbetohem me xhelozi e me felgrim: pse ju desh të duroni poshtërim e përbuzje prej paganëve,

⁷prandaj, kështu thotë Zoti Hyj: unë e ngrita dorën time në përbetim: popujt që janë përreth jush ata vetë do ta mbartin turpin e vet.

⁸E ju, o bjeshkët e Izraelit, lëshoni shatorr gemat tuaj e bëni fryte për popullin tim Izraelin, sepse është afër, po vjen!

⁹Ja, unë po vij tek ju, kah ju po sillem! Do të lëvroheni e do të mbilleni.

¹⁰Do t’ju shtoj me njerëz - mbarë shtëpinë e Izraelit, qytetet do të mbushen me banorë e rrënojat do të përtërihen.

¹¹Do t’ju mbushi me njerëz e me bagëti: do të shtohen e do të shumohen. Do të bëj të keni banorë si më parë, do t’ju bëj të mira më tepër se më parë e ju do ta dini se unë jam Zoti.

¹²Do t’i sjell te ju njerëzit - popullin tim Izraelin e do të bëhesh prona e tyre, trashëgimi i tyre e më nuk do t’ua shuash fëmijët.

¹³Kështu thotë Zoti Hyj: Pasi thonë për ju: ‘Është toka që i përpin njerëzit dhe që popullit ia shuan farën’,

¹⁴ja, pra, ti më s’do t’i përpish njerëzit dhe më nuk do t’ia tretësh farën popullit tënd - është fjala e Zotit Hyj.

¹⁵S’do të lejoj më kurrë që ta dëgjoj poshtërimin e paganëve mbi ty, kurrë më nuk do ta mbartësh turpin e popujve kundër teje dhe popullin tënd kurrë më nuk do ta lësh pa fëmijë - thotë Zoti Hyj.«

¹⁶Fjala e Zotit më qe drejtuar e më tha:

¹⁷»Biri i njeriut, kur shtëpia e Izraelit banonte në tokën e vet, e pat përdhosur atë me sjellje të vet e me veprat e veta: sjellja e tyre ishte para syve të mi porsi papastërtia e gruas së papastër.

¹⁸Unë atëherë e zbraza zemërimin tim mbi ta për shkak të gjakut që derdhën përmbi tokë dhe për shkak të idhujve, me të cilët e ndotën.

¹⁹I shpërndava ndër paganë dhe i treta në vende të ndryshme: i dënova sipas sjelljes së tyre dhe sipas veprave të tyre.

²⁰Por edhe në popuj, ndër të cilët u shpërndanë, te të cilët shkuan, e përdhosën emrin tim të shenjtë, sepse flitej për ta: ‘Ky është populli i Zotit e iu desh të dalë prej tokës së tij!’

²¹Por unë pata nderim për emrin tim të shenjtë që e çnderoi shtëpia e Izraelit në popuj ndër të cilët shkoi.

²²Prandaj, kështu thuaj shtëpisë së Izraelit: Kështu thotë Zoti Hyj: S’e bëj këtë për ju, o shtëpia e Izraelit, por për shkak të emrit tim të shenjtë, që u çnderua në popuj te të cilët shkuat.

²³Unë do ta shenjtëroj emrin tim të madhërueshëm, të cilin ju e çnderuat ndër popuj, e ndotët në mesin e tyre, që paganët ta dinë se unë jam Zoti - thotë Zoti Hyj, kur të dëftohem i shenjtë ndër ju e para syve të tyre.

²⁴Do t’ju heq prej paganëve e do t’ju bashkoj nga të gjitha vendet dhe do t’ju sjell në vendin tuaj.

²⁵Atëherë do të zbraz mbi ju një ujë të pastër dhe do të pastroheni nga të gjitha ndyrësitë tuaja. Do t’ju pastroj nga të gjithë idhujt tuaj!

²⁶Unë do t’ju jap një zemër të re, një shpirt të ri do ta fus në ju, do ta nxjerr nga mishi juaj zemrën e gurtë e do t’ju jap një zemër mishi.

²⁷Shpirtin tim do ta fus në ju e do të bëj që të ecni urdhërimeve të mia e t’i zbatoni e t’i shtini në veprim gjyqet e mia.

²⁸Do të banoni në tokën që ua dhurova etërve tuaj: ju do të jeni populli im e unë do të jem Hyji juaj.

²⁹Unë do t’ju pastroj nga të gjitha ndyrësitë tuaja. Do ta thërras grurin e do të bëj të bëhet me shumicë e më s’do t’ju ngarkoj me uri!

³⁰Do ta shumoj frytin e pemëve e prodhimet e arave, që të mos e pësoni më ndër popuj marren e urisë.

³¹Atëherë do t’ju bjerë ndër mend sjellja juaj tejet e keqe e veprat tuaja jo të mira e do t’ju bëjnë neveri paudhëritë tuaja e poshtërsitë tuaja.

³²Mirë dijeni, nuk e bëj këtë për hatër tuaj - thotë Zoti Hyj - duhet t’ju vijë marre e të skuqeni, shtëpia e Izraelit, për sjelljen tuaj!

³³Kështu thotë Zoti Hyj: Ditën kur t’ju kem pastruar nga të gjitha ndyrësitë tuaja e të kem bërë të banohen qytetet e të ripërtëriten rrënojat,

³⁴e kur toka e lënë djerr të jetë punuar, toka që dikur qe lënë e shkretë në sy të të gjithë kalimtarëve,

³⁵do të thonë: ‘Toka e mbetur shkretë u bë kopsht i Edenit, po banohen qytetet e mbetura shkretë, të rrënuara e të rrafshuarat po rindërtohen’.

³⁶Popujt do ta dinë, të gjithë ata që do të mbesin rreth jush, se unë Zoti i rindërtova të rrënuarat dhe i mbolla djerret. Thashë unë Zoti dhe ashtu do të bëj!

³⁷Kështu thotë Zoti Hyj: Edhe në këtë gjë do të lejoj t’i veshtrohet prej meje popullit të Izraelit kërkesa në të mirën e tij: Do t’ia shtoj njerëzit porsi grigjat,

³⁸porsi grigjë të shuguruar, porsi grigjën e Jerusalemit në festimet e tija. Kështu qytetet e rrënuara do të mbushen plot e përplot me njerëz dhe do ta dinë se unë jam Zoti.«