Të gjithë kapitujt

Gjoni · Kapitulli 7

Pabesimi i vëllazërisë së Jezusit, Festa e Tëbanave, etj.

53 vargje

Pabesimi i vëllazërisë së Jezusit

1Pastaj Jezusi vazhdoi të përshkojë Galilenë. Nuk donte të shkojë në Jude, sepse judenjtë e kërkonin për ta vrarë.

2Ishte afruar festa e judenjve, ajo e Tëbaneve.

3Prandaj i thanë vëllezërit e tij: »Kalo prej këndej e shko në Jude, që edhe nxënësit e tu t’i shohin veprat që bën;

4sepse askush, që dëshiron ta pranojnë botërisht, nuk vepron në fshehtësi. Nëse, pra, bën vepra të tilla, dëftohu botës!«

5Në të vërtetë, as vëllezërit e tij nuk besonin në të.

6Jezusi u përgjigji: »Koha ime s’ka ardhur ende. Për ju është gjithmonë kohë e volitëshme.

7Bota ju nuk mund t’ju urrejë, kurse mua më urren, sepse unë dëshmoj për të se i ka veprat e këqija.

8Ju shkoni në festë, unë tash një herë nuk po shkoj në këtë festë, sepse koha ime ende nuk është plotësuar.«

9Si u tha kështu, u ndal në Galile.

Festa e Tëbanave

10Pasi shkuan vëllezërit e tij në festë, shkoi edhe ai, jo ballafaqe, por si fshehtazi.

11Judenjtë e kërkonin gjatë festës dhe pyetnin: »Ku është ai?«

12Po edhe në popull u fol e u pëshpërit (shumë) për të. Disa thoshin: »Është i mirë!« Disa të tjerë: »Jo, por po gënjen popullin!«

13Por askush s’guxonte të fliste për të botërisht prej frikës së judenjve.

14Në gjysmën e festës Jezusi u ngjit në Tempull dhe po mësonte.

15Judenjtë u çuditën dhe pyetnin: »Si i di ky Shkrimet pa i pasë mësuar?«

16Jezusi u përgjigji: »Mësimi im nuk është imi, por i Atij që më dërgoi.

17Kush do të kryejë vullnetin e Tij do ta njohë a është ky mësimi i Hyjit, apo unë flas prej vetvetes.

18Ai që flet prej vetvetes, kërkon lavdinë e vet; ndërsa ai që kërkon lavdinë e Atij që e dërgoi, ai është i vërtetë, e në të s’ka padrejtësi.

19Vallë, a nuk jua dha Moisiu Ligjin? E askush prej jush nuk e mban Ligjin! Përse më kërkoni të më vritni?«

20Populli i përgjigji: »Të ka hyrë djalli në trup - kush kërkon të vrasë?!«

21Jezusi u përgjigji: »Një vepër bëra e të gjithë çuditeni.

22Juve Moisiu u dha rrethprerjen - e pra ajo nuk është prej Moisiut - por prej etërve, e ju rrethpritni njeriun të shtunën.

23Nëse njeriu mund të marrë rrethprerjen të shtunën - e nuk prishet Ligji i Moisiut, përse hidhëroheni në mua që e shërova krejt njeriun në e shtunë?

24Mos gjykoni më sipas dukjes së jashtme, por mësoni të gjykoni siç e lyp e drejta!«

Kush është Krishti?

25Atëherë disa jerusalemas thanë: »Po a nuk është ky ai që kërkojnë ta vrasin?

26E qe, ky po flet ballafaqe dhe askush s’po i thotë gjë! A thua mos pranuan edhe krerët se është Mesia?

27Por këtë e dimë se prej kah është e, kur të vijë Krishti, askush s’do ta dijë se nga është.«

28Atëherë Jezusi, që po mësonte në Tempull, foli me zë të lartë: »Po, ju më njihni dhe e dini se nga jam! E pra, unë nuk erdha prej vetvetes: por është Një i Vërtetë që më dërgoi, të cilin ju s’e njihni.

29Unë e njoh Atë, sepse jam prej tij dhe Ai më dërgoi.«

30Qysh atëherë kërkonin ta zënë, por askush s’vuri dorë mbi të, sepse ende nuk kish ardhur koha e tij.

31Shumë prej popullit besuan në të dhe thoshin: »Vallë, a thua, kur të vijë Mesia, do të bëjë ai më shumë mrekulli, se bëri ky?«

Krerët dërgojnë rojtarët për ta kapur Jezusin

32Farisenjtë dëgjuan se këto fjalë po pëshpëriteshin në popull për të e prandaj kryepriftërinjtë e farisenjtë dërguan rojtarët për ta kapur.

33Atëherë Jezusi tha: »Edhe pak kohë jam me ju dhe do të shkoj tek Ai që më dërgoi.

34Do të më kërkoni, por nuk do të më gjeni dhe ku jam unë, ju s’mund të vini.«

35Atëherë judenjtë i thanë njëri-tjetrit: »Ku mendon ky të shkojë që ne nuk do ta gjejmë? A mos mendon të shkojë ndër të shpërndarë midis grekëve dhe t’i mësojë grekët?

36Çka do të thotë fjala që tha: ‘Do të më kërkoni e nuk do të (më) gjeni dhe ku jam unë, ju s’do të mund të vini?’«

Lumenj uji të gjallë

37Ditën e fundit, në ditën e madhe të festës, Jezusi u ngrit dhe tha me zë të lartë: »Kush ka etje le të vijë tek unë! Le të pijë

38kush beson në mua! Sikurse thotë Shkrimi shenjt: ‘Lumenj uji të gjallë do të rrjedhin prej barkut të tij!’«

39Këtë e tha për Shpirtin, që kishin për ta marrë ata, që besojnë në të. Aso here, në të vërtetë, Shpirti nuk ishte dhënë ende, sepse Jezusi ende nuk kishte hyrë në lavdi.

Përçarje në popull

40Disa prej popullit, kur i dëgjuan këto fjalë, thoshin: »Ky është me të vërtetë Profeti!«

41Tjerë thoshin: »Ky është Mesia!« Prapë do tjerë thoshin: »Vallë, a prej Galilesë do të dalë Mesia?

42Po a nuk thotë Shkrimi shenjt se Mesia vjen nga pasardhësit e Davidit, mu nga Betlehemi, prej vendit nga ishte Davidi?«

43Kështu u bë përçarje në popull për shkak të tij.

44Disa deshën edhe ta kapin, por prapë askush s’vuri dorë në të.

Autoritetet nuk besojnë në të

45U kthyen, pra, rojtarët te kryepriftërinjtë e te farisenjtë dhe këta u thanë: »Pse nuk e sollët?«

46Rojtarët përgjigjën: »Askurrë askush s’ka folur si ky njeri!«

47Atëherë farisenjtë u përgjigjën: »Po a mos u mashtruat edhe ju?

48Pse, a është ndokush prej anëtarëve të Këshillit apo prej farisenjve që besoi në të?

49Por veç, kjo vogjëli që s’e njeh Ligjin - qoftë mallkuar!«

50U tha njëri prej tyre, Nikodemi - ai që më parë pat qenë te Jezusi:

51»Ligji ynë a thua dënon kë para se ta marrë në pyetje, para se ta dijë se çka bën?«

52Ata i përgjigjën: »A mos je edhe ti prej Galileje? Hulumto e do të shohësh se prej Galileje nuk ngritet profet!« [[

53Dhe se cili shkoi në shtëpinë e vet.