Jeta e re në Krishtin, Sjelljet e jetës së krishterë

¹Po ju përbej me mëshirën e Hyjit, o vëllezër, ta kushtoni trupin tuaj fli të gjallë, të shenjtë e të pëlqyeshme Hyjit - porsi kultin tuaj shpirtëror.

²Mos ju përshtatni parimeve të shekullit, por shndërrojeni e ripërtëriteni mendjen tuaj, në mënyrë që ta dalloni vullnetin e Hyjit: çka është e mirë, çka i pëlqen Atij, çka është e përsosur.

³Në emër të hirit që më është dhënë i them secilit prej jush: mos e çmoni veten më tepër se duhet ta çmoni, por vlerësoni veten me vlerësim të drejtë, secili simbas masës së fesë që ia dhuroi Hyji.

⁴Sepse, sikurse në një trup kemi shumë gjymtyrë dhe të gjitha gjymtyrët nuk e kanë të njëjtin funksion,

⁵kështu edhe ne, edhe pse shumë, jemi një trup i vetëm në Krishtin e, secili nesh, gjymtyrë e njëri-tjetrit.

⁶Kemi dhurata të ndryshme simbas hirit që na u dha: Në qoftë dhurata e profecisë - le të ushtrohet në përkim me fe;

⁷në qoftë dhurata e shërbimit - le të jetë në shërbim; në qoftë dhurata e dhënies së mësimeve - le të japë mësime;

⁸në qoftë dhurata e këshillit - le të këshillojë; kush ndan - le të jetë bujar; kush është i parë - le të jetë i kujdesshëm; kush bën vepra mëshire - le t’i bëjë me gëzim!

⁹Dashuria le të jetë e çiltër. Iknu me urrejtje veprave të këqija e ndiqni veprat e mira!

¹⁰Doni njëri-tjetrin me dashuri vëllazërore! Prini njëri-tjetrit duke nderuar shokun më parë e më tepër!

¹¹Në kujdesim të tjerëve të jeni të shpejtë, në shpirt të nxehtë; Zotit shërbeni!

¹²Në shpresë jini të gëzueshëm, në vështirësi të durueshëm, në uratë të qëndrueshëm!

¹³Ndihmoni të krishterët që kanë nevojë, ushtroni mikpritjen!

¹⁴Bekoni salvuesit tuaj! Bekoni e mos i nëmni!

¹⁵Gëzohuni me ata që gëzojnë, qani me ata që qajnë!

¹⁶Jini në përkim me njëri-tjetrin! Mos dëshironi nderë të larta, përkundrazi t’ju tërheqin ato të përvujtat! Mos ia mbushni mendjen vetes se jeni të urtë!

¹⁷Askujt mos ia ktheni të keqen me të keqe! Kini kujdes të bëni mirë para të gjithë njerëzve!

¹⁸Nëse është e mundur - aq sa varet prej jush - jini në paqe me të gjithë njerëzit!

¹⁹Mos u hakmerrni, o të dashur, po lini vend të veprojë hidhërimi i Hyjit, sepse është në Shkrim shenjt: ‘Mua më përket hakmarrja, unë do të hakmerrem,’ thotë Zoti.

²⁰Ti përkundrazi: ‘Nëse armiku yt është i uritur, jepi të hajë, nëse është i etur, jepi të pijë! Po bëre kështu, gaca të ndezura do të grumbullosh mbi krye të tij!’

²¹Mos lejo të mundë e keqja, por ngadhënje mbi të keqen me vepra të mira!