Të gjithë kapitujt

Zbulesa · Kapitulli 13

Dy Egërsirat

18 vargje

Dy Egërsirat

1Atëherë pashë: një Egërsirë po dilte prej detit. Kishte dhjetë brirë e shtatë kokë. Në brirë kishte dhjetë kurorë, kurse mbi kokë një emër blasfemues.

2Egërsira që unë pashë i ngjante leopardit; këmbët i kishte si të ariut, kurse goja si gojë luani. Dragoi ia dha fuqinë e vet, fronin e vet dhe një forcë të madhe.

3Njërën ndër kokë e kishte të plagosur për vdekje, porse plaga vdekjeprurëse iu shërua. Mbarë toka, e mrekulluar, e ndiqte Egërsirën,

4dhe të gjithë e adhuruan Draguan që i dha Egërsirës një pushtet të tillë. E adhuruan edhe Egërsirën dhe thoshin: »Kush është si Egërsira!? Kush do të ketë guxim të luftojë kundër saj?«

5Dhe iu dha goja të flasë fjalë të mëdha e blasfemi dhe iu dha pushteti ta bëjë këtë gjë për dyzet e dy muaj.

6Ajo e hapi gojën e vet për ta blasfemuar Hyjin, për të blasfemuar Emrin e tij, Tendën e tij dhe ata që banojnë në qiell.

7Iu dha pushteti të bëjë luftë kundër shenjtërve dhe t’i fitojë. Iu dha pushtet mbi çdo fis, popull gjuhë dhe komb,

8që ta adhurojnë të gjithë banuesit e tokës, ata, emrat e të cilëve nuk u shkruan qysh prej krijimit të rruzullit në librin e jetës të Qengjit të flijuar.

9Kush ka veshë, le të dëgjojë!

10»Kush të jetë për robëri do të bjerë në robëri; kush të jetë për t’u prerë me shpatë, me shpatë do të pritet!« Në këtë përmbahet qëndresa dhe feja e shenjtërve!

11Atëherë pashë: një tjetër Egërsirë po dilte nga toka. Kishte dy brirë porsi qengji, por fliste porsi Dragoi.

12Ajo ushtron tërë pushtetin e Egërsirës së parë në praninë e saj. Ajo bën tokën dhe të gjithë banuesit e saj ta adhurojnë përdhuni Egërsirën e parë, të cilës iu shërua plaga vdekjeprurëse.

13Ajo bën shenja të mëdha: deri edhe zjarrin e bën të ulet nga qielli përmbi tokë ndër sy të njerëzve.

14Gënjen banuesit e tokës me shenja që iu dha pushteti t’i bëjë në prani të Egërsirës, i nxit banuesit e tokës të punojnë një trupore në nder të Egërsirës të plagosur me shpatë, por që shpëtoi.

15Iu dha edhe ta fryjë frymën në truporen e Egërsirës, kështu që ajo trupore të flasë e të vriten të gjithë ata që nuk e adhurojnë truporen e Egërsirës.

16Bën që të gjithëve - të vegjëlve e të mëdhenjve, të pasurve e skamnorëve, të lirëve e skllevërve - t’u vihet vula në dorën e djathtë ose në ballë,

17që askush të mos mund të blejë as të shesë përveç atij që mbart vulën me emrin e Egërsirës ose me numrin e emrit të saj.

18Këtu duhet dije! Kush ka mend, le ta llogarisë numrin e Egërsirës! Ai numër është i një njeriu e numri është gjashtëqind e gjashtëdhjetë e gjashtë!