Përshëndetje dhe falënderim, Përçarjet në kishën e Korintit, etj.

¹Pali, për vullnet të Hyjit i grishur të jetë apostull i Krishtit Jezus, edhe vëlla Sosteni,

²Kishës së Hyjit që është në Korint, të shenjtëruarve në Krishtin Jezus, të grishurve të jenë shenjtër, bashkë me të gjithë ata, që në cilindo vend e thërrasin Emrin e Zotit tonë, Jezu Krishtit, Zotit të tyre dhe tonë.

³Paçi hir e paqe prej Hyjit, Atit tonë, dhe prej Zotit Jezu Krisht!

⁴Përherë i falem nderit Hyjit tim për ju që ju dha hirin hyjnor me anë të Krishtit Jezus,

⁵sepse në Krishtin ju u bëtë të pasur me gjithçka - në çdo fjalë e në çdo dije.

⁶Kështu, aq u përforcua në ju dëshmia e Krishtit,

⁷sa që nuk ju mungon asnjë dhuratë juve që pritni Zbulimin e Zotit tonë Jezu Krishtit.

⁸Por edhe Ai do t’ju forcojë deri në fund që të jeni pa mungesa në Ditën e Zotit tonë Jezusit (Krisht).

⁹Besnik është Hyji që ju thirri në shoqërinë e Birit të vet, Jezu Krishtit, Zotit tonë.

¹⁰Ju përbej, o vëllezër, pashë Emrin e Zotit tonë Jezu Krishtit: jini të gjithë një mendimi e të mos ketë përçarje ndër ju, por të jeni në përkim të plotë me ndjenja e në mendime.

¹¹Sepse, o vëllezër, njerëzit e Klojes më lajmëruan se mes jush ka grindje.

¹²Ja, ku e kam fjalën: secili prej jush thotë: »Unë jam i Palit!« »Unë i Apolit!« »Unë i Kefës!« »Unë jam i Krishtit!«

¹³Vallë, a qenka Krishti i ndarë? A mos u kryqëzua Pali për ju? Apo u pagëzuat në emër të Palit?

¹⁴E falënderoj Hyjin që, me përjashtim të Krispit e të Gajit, nuk pagëzova asnjë ndër ju,

¹⁵që askush të mos mund të thotë se u pagëzuat në emër tim.

¹⁶E po, paskam pasë pagëzuar edhe familjen e Stefanës! Sa më kujtohet, nuk kam pagëzuar tjerë.

¹⁷Sepse Krishti nuk më dërgoi të pagëzoj, por të predikoj Ungjillin, madje ta predikoj, jo me dituri fjale, që të mos i humbë fuqia kryqit të Krishtit.

¹⁸E njëmend, predikimi për kryqin, për ata që dënohen, është marri, kurse, për ne të shëlbuarit, është fuqia e Hyjit.

¹⁹Sepse është në Shkrim shenjt: ‘Do ta asgjësoj dijen e të dijshmëve, do ta bëj të kotë urtinë e të urtëve.’

²⁰Ku është i dijshmi? Ku është mësuesi i Ligjit? Ku është shqyrtuesi i kësaj bote? Pse, a nuk e bëri Hyji marri urtinë e botës?

²¹Për të vërtetë, pasi bota me urtinë e vet nuk e njohi Hyjin me anë të dijes së zbuluar prej Hyjit, i pëlqeu Hyjit, me marrinë e predikimit t’i shëlbojë besimtarët.

²²E, ndërsa hebrenjtë kërkojnë mrekulli e grekët lypin urti,

²³ne predikojmë Krishtin e kryqëzuar - për hebrenj shkandull e për paganë marri,

²⁴kurse për të grishurit - si për hebrenj si për grekë - Krishtin - fuqinë e Hyjit dhe dijen e Hyjit.

²⁵Sepse, çka në Hyjin duket marri, është më e dijshme se njerëzit e çka në Hyjin duket dobësi, është më e fuqishme se njerëzit.

²⁶Jo, po, vëllezër, pleqëroni kush jeni ju që e morët thirrjen e Hyjit? S’ka ndër ju shumë të dijshëm për sy të njerëzve, as shumë të fuqishëm, as shumë bujarë!

²⁷Por, Hyji zgjodhi të marrët në sy të botës për t’i turpëruar të mençurit dhe të dobtit në sy të botës i zgjodhi Hyji, për t’i turpëruar të fortit;

²⁸dhe jo bujarët e botës e të përbuzurit i zgjodhi Hyji, mu edhe ata që nuk janë, që t’i asgjësojë ata që janë,

²⁹në mënyrë që asnjë njeri të mos mburret para Hyjit.

³⁰Po, Ai bëri »që ju të jeni« në Krishtin Jezus, i cili u bë për ne dije që vjen prej Hyjit, drejtësi, shenjtërim dhe shpërblim,

³¹sikurse thotë Shkrimi shenjt: ‘Kush mburret, le të mburret në Zotin.’