Të ngjallurit e Krishtit, Ngjallja prej vdekjes, etj.

¹Tani, o vëllezër, po ju përkujtoj Ungjillin, që ju pata predikuar, që e pranuat e në të cilin qëndroni.

²Me anë të tij jeni në udhën e shëlbimit nëse do ta mbani ashtu si jua kam predikuar; përveç se në paçi besuar kot.

³Dhe njëmend, më së pari ju shpalla ato të vërteta që edhe unë vetë i mora: se Krishti vdiq për mëkatet tona sikurse e paralajmëroi Shkrimi shenjt.

⁴Qe varrosur e të tretën ditë u ngjall së vdekuri si u tha në Shkrimin shenjt.

⁵Iu duk Kefës e pastaj të Dymbëdhjetëve.

⁶Pastaj u duk vëllezërve që ishin së bashku më shumë se pesëqind vetë, prej të cilëve shumica janë ende gjallë e disa kanë vdekur.

⁷Pastaj iu dëftua Jakobit e mandej të gjithë apostujve.

⁸Më së fundi m’u dëftua edhe mua - dështakut.

⁹E në të vërtetë, unë jam më i vogli ndër apostuj; unë nuk jam i denjë as të quhem apostull, sepse e kam salvuar Kishën e Hyjit.

¹⁰Por, në saje të hirit të Hyjit, jam ky që jam, dhe hiri i tij në lidhje me mua nuk ka qenë i kotë. Madje u mundova të veproj më shumë se të gjithë ata, njëmend, jo unë vetëm, por edhe hiri i Hyjit me mua.

¹¹Pra, si unë, ashtu edhe ata: kështu predikojmë e kështu edhe ju besuat.

¹²Por, në qoftë se predikohet se Krishti është ngjallur prej të vdekurish: si atëherë disa prej jush thonë: »Nuk ka ngjallje prej të vdekurve.«?

¹³Po qe se të vdekurit nuk do të ngjallen - atëherë as Krishti nuk është ngjallur.

¹⁴Por, në qoftë se Krishti me të vërtetë nuk është ngjallur, [atëherë] i kotë është predikimi ynë - i kotë besimi juaj.

¹⁵Atëherë edhe ne do të ishim dëshmitarë të rrejshëm kundër Hyjit, sepse kemi dëshmuar kundër Hyjit duke pohuar se Hyji e ngjalli Krishtin, të cilin nuk e ka ngjallur, në qoftë se të vdekurit nuk ngjallen.

¹⁶Sepse, në mos u ngjallshin të vdekurit, as Krishti nuk është ngjallur.

¹⁷Po në qoftë se Krishti nuk është ngjallur, e kotë është feja juaj, ende jeni në mëkatet tuaja.

¹⁸Atëherë edhe ata që vdiqën në Krishtin, u borën.

¹⁹E në qoftë se në Krishtin shpresojmë vetëm në të mirat e kësaj jete, atëherë ne jemi njerëzit më të mjerët.

²⁰Por, verevërtet, Krishti u ngjall prej të vdekurve! Ai është fryti i parë i të vdekurve!

²¹Kështu, pra, nëpër një njeri erdhi vdekja, përsëri nëpër një NJERI vjen ngjallja prej së vdekuri.

²²Dhe, sikurse në Adamin vdesin të gjithë njerëzit, ashtu nëpër Krishtin të gjithë njerëzit do ta rifitojnë jetën.

²³Veçse, secili sipas radhës së vet: një herë fryti i parë - Krishti, pastaj, në Ditën e Gjyqit, ata që i përkasin Krishtit,

²⁴pastaj - mbarimi, kur Krishti t’ia dorëzojë mbretërinë Hyjit Atë, pasi të ketë asgjësuar çdo parësi, çdo pushtet e çdo fuqi.

²⁵Sepse Atij i takon të mbretërojë derisa t’i vërë nën këmbët e tija të gjithë armiqtë e tij.

²⁶Armiku i fundit që do të asgjësohet, do të jetë vdekja.

²⁷Sepse »gjithçka ka vënë nën këmbët e tija«. E kur thotë Shkrimi shenjt: »Gjithçka i ka vënë nën këmbë« - merret vesh gjithçka, me përjashtim të Atij, që ia nënshtroi të gjitha.

²⁸E kur t’ia ketë nënshtruar të gjitha, [edhe] vetë Biri do t’i nënshtrohet Atij që ia nënshtroi të gjitha, që Hyji të jetë gjithçka në të gjithë.

²⁹Nëse nuk është kështu, çka fitojnë atëherë ata që pagëzohen për të vdekur? Në qoftë se të vdekurit kurrsesi nuk ngjallen, pse atëherë të pagëzohen për ta?

³⁰Po edhe ne, përse atëherë e vëmë veten në rrezik për çdo moment?

³¹Për çdo ditë vdes, [o vëllezër], pasha lavdinë që e kam për shkak tuaj te Jezu Krishti, Zoti ynë!

³²Çfarë dobie do të kemi në qoftë se kam luftuar vetëm si njeri kundër egërsirave në Efes? Në qoftë se të vdekurit nuk ngjallen, atëherë: ‘Të hamë e të pimë se nesër do të vdesim!’

³³Mos e rreni veten: ‘Bisedat e këqija i prishin doket e mira.’

³⁴Mblidhni mirë mendtë e mos mëkatoni, se - për turpin tuaj po e them - disa prej jush nuk e njohin Hyjin.

³⁵Por, ndokush do të pyesë: »Si ngjallen të vdekurit?« dhe: »Me çfarë trupi do të vijnë?«

³⁶I pamend! Çka ti mbjell, nuk e fiton jetën, po s’vdiq!

³⁷Dhe çka mbjell, nuk mbjell trupin e ardhshëm, por një kokërr të thjeshtë - po e zëmë gruri apo të ndonjë fare tjetër.

³⁸Pastaj Hyji i jep lëndën ashtu si ai do, - secilës farë trupin e vet.

³⁹E çdo trup nuk është i njëjtë me çdo trup tjetër. Tjetër është trupi i njeriut, tjetër trupi i kafshëve, tjetër trupi i shpendëve, e tjetër trupi i peshqve.

⁴⁰E ka trupa qiellorë e trupa tokësorë; por tjetër është shkëlqimi i trupave qiellorë e tjetër i trupave tokësorë.

⁴¹Tjetër është shkëlqimi i diellit e tjetër i hënës e tjetër i yjeve; madje ylli prej yllit dallohet në shkëlqim.

⁴²Kështu edhe ngjallja e të vdekurve: mbillet në shkatërrueshmëri e ngjallet në pashkatërrueshmëri;

⁴³mbillet në çnderim e ngjallet në lavdi; mbillet në dobësi e ngjallet në fuqi;

⁴⁴mbillet trup lëndor e ngjallet trup shpirtëror. Nëse ka trup lëndor, ka edhe trup shpirtëror.

⁴⁵Kështu është edhe shkruar: ‘Njeriu i parë, Adami - u bë shpirt i gjallë, Adami i fundit - Shpirti që jep jetën.

⁴⁶Por, nuk qe më parë qenësi shpirtëror, por qenësi lëndor e atëherë u bë qenësi shpirtëror.

⁴⁷Njeriu i parë është nga toka, tokësor; njeriu i dytë nga qielli.

⁴⁸Si është njeriu tokësor, të tillë janë edhe tokësorët, si është njeriu qiellor, të tillë janë edhe qiellorët.

⁴⁹Sikurse kemi qenë në përngjasimin e njeriut tokësor, ashtu do të jemi edhe në përngjasimin e njeriut qiellor.

⁵⁰Dhe, ja, vëllezër, se çka unë pohoj: mishi e gjaku nuk mund ta trashëgojnë Mbretërinë qiellore, as shkatërrueshmëria nuk e trashëgon pashkatërrueshmërinë.

⁵¹Ja, po jua tregoj misterin: nuk do të vdesim të gjithë, por të gjithë do të shndërrohemi.

⁵²Përnjëherë, sa çel e mbyll syrin, në zërin e borisë së fundit - sepse do të bjerë boria - të vdekurit do të ngjallen të pashkatërrueshëm edhe ne do të shndërrohemi.

⁵³Sepse, ky trup i shkatërrueshëm do të veshet me pashkatërrueshmërinë, dhe ky trup i vdekshëm, do të veshet me pavdekshmërinë.

⁵⁴Dhe, kur ky trup i shkatërrueshëm, të veshë pashkatërrueshmërinë dhe ky trup i vdekshëm të veshë pavdekshmërinë, atëherë do të shkojë në vend fjala e Shkrimit shenjt: ‘Vdekja u përpi në fitore.

⁵⁵O vdekje, ku është ngadhënjimi yt? Ku është, o vdekje, thimthi yt?’

⁵⁶Thimthi i vdekjes mëkati; fuqia e mëkatit Ligji.

⁵⁷Ta falënderojmë Hyjin që na e jep fitoren nëpër Jezu Krishtit, Zotit tonë.

⁵⁸Prandaj, vëllezërit e mi të dashur, të jeni të qëndrueshëm, të palëkundshëm e përparoni vazhdimisht në veprën e Zotit, të vetëdijshëm se mundi juaj nuk mbetet i pafrytshëm në Zotin.