Ndihmat për Kishën e Jerusalemit, Planet e veprimtarisë, etj.

¹Për sa i përket mbledhjes së ndihmave për shenjtër bëni edhe ju si u kam urdhëruar kishave të Galacisë.

²Të parën ditë të secilës javë, secili prej jush të ndajë në vete sa të ketë mundur të kursejë, në mënyrë që të mos mblidhen vetëm kur të vij vetë.

³Kur të vij do t’i dërgoj me letërpërcjellëse ata që ju t’i zgjidhni për ta çuar dhuratën tuaj në Jerusalem.

⁴Po qe më mirë të shkoj edhe vetë, do të vijnë me mua.

⁵Te ju do të vij posa ta kaloj Maqedoninë. Maqedoninë vetëm do ta përshkoj

⁶e te ju dua të ndalem, ndoshta edhe të dimëroj, që ju të përgatitni sa më lypet për vazhdimin e udhëtimit tim.

⁷Dhe, vërtet, nuk doja t’ju shoh vetëm në kalim. Në të vërtetë, shpresoj se, me ndihmë të Zotit, do të qëndroj për do kohë në mesin tuaj.

⁸Deri Rrëshajëve do të qëndroj në Efes,

⁹pasi m’u dha rasti i mrekullueshëm të veproj e kundërshtarët janë të shumtë.

¹⁰Nëse vjen te ju Timoteu, këqyrni të jetë pa frikë në mesin tuaj, sepse kryen, porsi unë, veprën e Zotit.

¹¹Askush, pra, të mos e përbuzë. Jepni çka i lypet për udhëtim e të vijë në paqe te unë, sepse e pres unë e vëllezërit.

¹²Për sa i përket vëllait Apol, mjaft e nxita të vijë te ju me vëllezër, por kurrsesi nuk iu duk të vinte tani, por do të vijë kur të ketë rast të volitshëm.

¹³Rrini zgjuar! Qëndroni të palëkundshëm në fe! Bënu burra! Jini të fortë!

¹⁴Bëni gjithçka me dashuri!

¹⁵Vëllezër, edhe një porosi: e dini se familja e Shtjefnës është fryti i parë i Akajës dhe se iu kushtua shërbimit të shenjtërve -

¹⁶nderoni të tillët dhe secilin që bashkëpunon dhe vepron për fe.

¹⁷Jam shumë i kënaqur për ardhjen e Shtjefnës, të Fortunatit e të Ahaikut, sepse ata e plotësuan mungesën tuaj:

¹⁸e qetësuan shpirtin tim dhe tuajin. Prandaj nderoni të tillët!

¹⁹Ju përshëndesin kishat e Azisë. Ju përshëndesin për së forti në Zotin Akuila e Priska bashkë me kishën që bashkohet në shtëpinë e tyre.

²⁰Ju bëjnë të fala të gjithë vëllezërit. Përshëndetni njëri-tjetrin me puthje të shenjtë.

²¹Të fala me dorën time - Pali.

²²Kush nuk e do Jezu Krishtin, qoftë mallkuar! Marranà tha!

²³Hiri i Zotit Jezu Krisht qoftë me ju!

²⁴Ju dua të gjithëve në Jezu Krishtin.