Thirrja në gjyqe të të pafeve, Lavdëroni në trupin tuaj Hyjin

¹A do të guxojë ndokush prej jush, nëse ka ndonjë padi kundër ndonjë tjetri, të kërkojë të drejtën në gjyq para paganëve e jo para shenjtërve?

²Po a nuk e dini se shenjtërit do ta gjykojnë botën? E, nëse ju do ta gjykoni botën, po a thua s’jeni të zotët t’i gjykoni sendet më të vogla?

³Po a nuk e dini se do t’i gjykojmë edhe engjëjt e jo më gjërat e përditshme?

⁴E ju, kur keni ndonjë pleqësi për gjërat e përditshme, shkoni e më vini pleq disa që Kisha i mban për asgjë?

⁵Le t’ju vijë turp që më detyroni t’jua them këtë gjë! Kështu a? A thua nuk gjendet ndër ju asnjë i dijshëm, i cili do të mund të pleqëronte midis vëllezërve të vet?

⁶Por vëllai me vëlla paditet, madje para të pafeve?!

⁷Po edhe vetë puna që paditeni njëri me tjetrin është e metë për ju. Pse më mirë nuk e duroni padrejtësinë? Pse më mirë nuk duroni të plaçkiteni?

⁸Por, përkundrazi, ju vetë bëni padrejtësi dhe plaçkitni, e kë se? Vëllezërit!

⁹A thua nuk e dini se ata që bëjnë padrejtësi nuk do të kenë pjesë në Mbretërinë e Hyjit? Mos u tradhtoni! As fëlligështarët, as idhujtarët, as kurorëthyesit, as homoseksualët e çdo lloji,

¹⁰as vjedhësit, as pijanecat, as shpërralluesit, as cubat nuk do të kenë pjesë në Mbretërinë e Hyjit.

¹¹Pra, të tillë ishit disa, por u latë, por u shenjtëruat, por e fituat shfajësimin në saje të Emrit të Jezu Krishtit Zot dhe të Shpirtit të Hyjit tonë.

¹²»Për gjithçka kam leje…!« »Por gjithçka nuk më sjell dobi!« »Për gjithçka kam leje…!« »Por - s’dua që ndonjë gjë të më sundojë.«

¹³»Gjellat janë për bark e barku për gjella…!« »Por Hyji do t’i shkatërrojë këtë dhe ato. E trupi nuk është për fëlligështi, por i përket Zotit, e Zoti për trupin.

¹⁴Tani, Hyji që e ngjalli Zotërinë me fuqinë e vet, edhe ne do të na ngjallë.

¹⁵A nuk e dini se trupat tuaj janë gjymtyrë të Krishtit? A do t’i marr, pra, gjymtyrët e Krishtit e do t’i bëj gjymtyrë të një lavireje? Mos e thashtë Zoti!

¹⁶[Apo] A nuk e dini se ai që bashkohet me laviren, bëhet me të një trup? Sepse thuhet: ‘Do të jenë të dy një trup i vetëm.’

¹⁷Kurse ai që shpirtërisht bashkohet me Zotin, është me Të një shpirt.

¹⁸Ikni prej fëlligështisë! Çdo mëkat që bën njeriu është jashtë trupit, kurse ai njeri që bën fëlligështi, mëkaton kundër trupit të vet.

¹⁹Apo nuk e dini se trupi juaj është Tempulli i Shpirtit Shenjt që banon në ju që e keni prej Hyjit dhe se ju nuk i përkitni më vetvetes?

²⁰Sepse jeni blerë me çmim të lartë. Prandaj, jepni lavdi Hyjit në trupin tuaj!