Aleatët e parë të Davidit, Davidi i pranoi dhe i bëri krerë togash., etj.

¹Edhe këta erdhën te Davidi në Siceleg kur ende ikte prej Saulit, birit të Cisit. Ishin trima të fortë dhe luftëtarë të zgjedhur,

²mjeshtra të harkut dhe me të dy duart mund të qitnin gurë dhe të drejtonin shigjeta. Prej vëllezërve të Saulit, prej Benjaminajve:

³Prijësi Ahiezeri dhe Joasi, bijtë e Samasë Gabaanaj, Jazieli e Faleti, bijtë e Azmotit, Baraha e Jehui Anatotaj,

⁴Samajasi Gabaonaj, trim i fortë ndër të Tridhjetët dhe në krye të të Tridhjetëve.

⁵Jeremia, Jehezieli, Johanani dhe Jozabadi Gaderonaj,

⁶Eluzaji, Jerimuthi, Baalia, Samaria e Safatia Harufaj,

⁷Elkana, Jesia, Azareeli, Joezeri, Jesbaami nga Karehimi,

⁸Joela dhe Zabadia, bijtë e Jerohamit nga Gedori.

⁹Po ashtu edhe prej Gadit kaluan në anë të Davidit, kur po fshihej në shkretëtirë, disa burra të fortë dhe luftëtarë të përmendur që mbanin shqyt e heshtë. Për kah duka ishin si luan e për kah shpejtësia si dhitë e egra të bjeshkëve.

¹⁰Ezeri, prijës, Obdia, i dyti, Eliabi, i treti,

¹¹Masmana i katërti, Jeremia, i pesti,

¹²Etthiu, i gjashti, Elieli, i shtati,

¹³Johanani, i teti, Elzebadi, i nënti,

¹⁴Jeremia, i dhjeti, Makbanaji, i njëmbëdhjeti.

¹⁵Këta ishin prej bijve të Gadit, prijës ushtarakë: më i vogli ngadhënjente mbi njëqind e më i madhi mbi një mijë.

¹⁶Këta janë ata që e kaluan Jordanin në muajin e parë, kur e kishte zakon të vërshonte mbi brigjet e veta, dhe i dëbuan të gjithë banuesit e luginave në lindje e në perëndim.

¹⁷Erdhën edhe prej djemve të Beniaminit e të Judës në qytezën ku qëndronte Davidi.

¹⁸Davidi u doli përpara dhe u tha: »Nëse vini tek unë me qëllime paqësore për të më ndihmuar, jam gati të bashkohem me ju; por, nëse vini për të më tradhtuar e për të më vënë pritë në vend të kundërshtarëve të mi, pasi unë jam i pafajshëm, paftë Hyji i etërve tanë e gjykoftë!«

¹⁹Atëherë Shpirti i frymëzoi Amasajin prijësin ndër të Tridhjetëve, e tha: »Të tutë jemi, o David, e me ty, o biri i Isait! Paqja, paqja me ty e paqja me ndihmësit e tu: sepse ty të ndihmon Hyji yt!

²⁰Në anën e Davidit kaluan edhe disa prej fisit të Manaseut, kur Davidi po shkonte në luftë kundër Saulit me filistenj, por nuk luftoi bashkë me ta, sepse e kthyen prijësit e filistenjve pasi u këshilluan, me këto fjalë: »Në dëm të kokës sonë ky do të kthehet te zotnia i vet Sauli.«

²¹Kështu, kur u kthye në Siceleg, prej Manaseut tek ai kaluan: Ednasi, Jozabadi, Jediheli, Mikaeli, Jozabadi, Eliu e Salatiu që ishin prijës të mijërave të Manaseut.

²²Këta iu bënë ndihmë Davidit kundër cubave. Njëmend të gjithë ishin burra të fortë dhe u bënë prijës në ushtri.

²³Por edhe dita-ditës vinin tek Davidi për t’i ndihmuar derisa u bë në numër aq i madh gadi si ushtria e Hyjit.

²⁴Ky është numri i prijësve të ushtrisë që erdhën te Davidi kur ishte në Hebron për t’ia kaluar atij mbretërinë e Saulit sipas urdhrit të Zotit:

²⁵Prej bijve të Judës që mbanin shqyt e heshtë: gjashtë mijë e tetëqind të armatosur për luftë.

²⁶Prej bijve të Simonit, shtatë mijë e njëqind burra të fortë për luftë.

²⁷Prej bijve të Levit katër mijë e gjashtëqind;

²⁸po kështu edhe prijësi Jojada, prej barkut të Aronit, e bashkë me të tri mijë e shtatëqind vetë.

²⁹Gjithashtu edhe prijësi i ri Sadoku trim i trimave dhe familja e tij, njëzet e dy prijës.

³⁰Prej fisit të Beniaminit, vëllezërve të Saulit, tri mijë; shumica e të cilëve deri atëherë kishte qenë në shërbim të shtëpisë së Saulit.

³¹Kurse prej bijve të Efraimit njëzet mijë e tetëqind, trima të fortë, njerëz të zgjedhur të familjes së tyre.

³²Prej gjysmës së fisit të Manaseut, tetëmbëdhjetë mijë, të caktuar me emër, për ta shpallur mbret Davidin.

³³Po ashtu edhe prej bijve të Isaharit, njerëz të ditur, që ishin të aftë për ta njohur kohën e për të mësuar se çfarë duhej të bënte Izraeli; dyqind prijës dhe të gjithë vëllezërit e tyre nën urdhrat e atyre.

³⁴Kurse prej Zabulonit, të aftë për luftë dhe të armatosur me të gjitha armët luftarake, erdhën pesëdhjetë mijë, për t’u bashkuar në ndihmë jo me zemër me zhibla.

³⁵Prej Neftaliut një mijë prijës dhe bashkë me ta të armatosur me shqyta e me heshta tridhjetë e shtatë mijë luftëtarë.

³⁶Prej Danit, të gatshëm për luftë, njëzet e tetë mijë e gjashtëqind.

³⁷Kurse prej Aserit dyzet mijë të aftë për luftë e të gatshëm për luftim.

³⁸Prej Transjordanit njëqind e njëzet mijë vetë, prej Rubenit, prej Gadit e prej gjysmës së fisit të Manaseut, burra të armatosur me çdo lloj armësh lufte.

³⁹Të gjithë këta burra luftëtarë të aftë për të luftuar, me zemër të çiltër erdhën në Hebron për ta bërë Davidin mbret mbi mbarë Izraelin; por edhe të gjithë izraelitët e tjerë ishin të mendimit që Davidi të bëhej mbret.

⁴⁰Qëndruan te Davidi tri ditë. Hëngrën e pinë sepse vëllezërit u kishin përgatitur gjithçka.

⁴¹Por edhe ata, fqinjët e tyre më të afërt, që ishin përreth, prej Isaharit, Zabulonit e Neftaliut, kishin sjellë ushqime në gomarë, deve, mushka dhe qe: miell, bukëfike, rrush të thatë, verë, vaj, bagëti të trasha e të imëta me shumicë, sepse ishte gëzim në Izrael.