Këshilla tjera lidhur me mbledhjen e ndihmave

¹Lidhur me ndihmat në dobi të shenjtërve s’është nevoja t’ju shkruaj më gjatë.

²Vërtet, e di gatishmërinë tuaj, për të cilën mburrem para maqedonasve: »Akaja është gati qysh vitin e shkuar!« Dhe gatishmëria juaj nxiti shumë të tjerë.

³Megjithatë po i dërgoj vëllezërit që të mos qitet poshtë në këtë pikëpamje mburrja jonë për ju, që të jeni të gatshëm, sikurse kam thënë që

⁴- nëse me mua vijnë maqedonas e ju gjejnë të papërgatitur, të mos koritemi ne - për të mos thënë ju - pikërisht në këtë gjë, me të cilën u mburrëm.

⁵Prandaj, e kam çmuar për detyrë t’i dërgoj përpara vëllezërit që ta bëjnë gati dhuratën tuaj të premtuar që më parë e të jetë gati - si dhuratë bujarie e jo koprracie.

⁶Sepse: »Kush mbjell me horrjati, pak do të korrë, e kush mbjell me begati, me begati do të korrë.«

⁷Secili le të japë aq sa i mbaston zemra, jo i prishur e përdhunë, sepse: ‘Hyji e do atë që jep me gëzim.’

⁸Hyji mund t’ju dhurojë çdo të mirë që gjithmonë të keni gjithçka mjaft për vete e t’ju teprojë gjithnjë për të ndihmuar çdo vepër të mirë,

⁹sikurse është në Shkrim shenjt: ‘Ai ndan me bujari, u jep skamnorëve; drejtësia e tij qëndron në amshim.’

¹⁰Ai që mbjellësit i jep farën, ai do t’i japë edhe bukën për ushqim. Ai edhe juve do t’ju japë farë e do ta shumëzojë dhe do të bëjë të rriten frytet e drejtësisë suaj.

¹¹Kështu do të pasuroheni me çdo bujari, e cila me ndërmjetësinë tonë do ta lartësojë te Hyji himnin e falënderimit,

¹²sepse kjo shërbesë ndihme nuk vlen vetëm për të përmbushur nevojat e shenjtërve, por edhe është plot falënderje të shumta ndaj Hyjit.

¹³Besimtarët, duke e parë ndihmën tuaj do ta lavdërojnë Hyjin për bindjen tuaj kundrejt Ungjillit të Krishtit dhe për bujarinë tuaj, me të cilën merrni pjesë me ta e me të gjithë.

¹⁴Ata do të luten për ju e do ta tregojnë dashurinë e madhe ndaj juve për arsye të begatisë së hirit që Hyji ka ndikuar në ju.

¹⁵Lavdi Hyjit për dhuratën e tij të patregueshme!