Fjalët e Amosit që ishte bari delesh nga Tekua, Titulli, etj.

¹Fjalët e Amosit që ishte bari delesh nga Tekua. Vegimet që pati lidhur me Izraelin në ditët e Ozisë, mbretit të Judës, e në ditët e Jeroboamit, birit të Joasit, mbretit të Izraelit, dy vjet para tërmetit.

²Ai tha: “Zoti ulërin nga Sioni, nga Jerusalemi bën t’i dëgjohet zëri; u mbuluan në zi kullotat e barinjve, shkrumb u tha bjeshka e Karmelit!”

³Kështu thotë Zoti: “Për tri keqbërje të Damaskut e për katër s’do ta kthej prapa vendimin: pse e shinë Galaadin me karroca të hekurta

⁴do të çoj zjarrin në shtëpi të Azaelit, do ti djeg shtëpitë e Benadadit;

⁵do t’ia thyej shulin Damaskut, do t’ia shpërndaj banorët Biceatavenit edhe mbajtësin e skeptrit të Betedenit, në Cir populli i Syrisë do të tretet!” thotë Zotynë.

⁶Kështu thotë Zoti: “Për tri keqbërje të Gazës e për katër s’do ta kthej prapa vendimin: pse shpërngulën popullsi të tëra nëskllavëri për t’ia dorëzuar Edomit,

⁷do të çoj zjarrin në muret e Gazës, do t’ia përlaj pallatet

⁸do t’ia shpërndaj Azotit banorët, mbajtësin e skeptrit të Askalonit, do të çoj dorë mbi Akaronin, do të shuhet teprica e filistenjve!”, - është fjala e Zotit.

⁹Kështu thotë Zoti: “Për tri keqbërje të Tirit e për katër s’do ta kthej prapa vendimin: pse shpërngulën popullsi të tëra e ia dorëzuan skllevër Edomit e sçanë kokën për lidhjen vëllazërore,

¹⁰do të çoj zjarrin në mure të Tirit, do ti përlajë pallatet e tij!”

¹¹Kështu thotë Zoti: “Për tri keqbërje të Edomit e për katër s’do ta kthej prapa vendimin: pse e përndoqi me shpatë vëllain e vet, e ndrydhi në vete dhimbjen e vet, madje e ngacmoi furinë e vet, zemërimin e egërsoi der’ në fund,

¹²do ta çoj zjarrin në Teman, do t’ia djeg Bosrës pallatet!”

¹³Kështu thotë Zoti: “Për tri keqbërje të bijve të Amonit e për katër s’do ta kthej prapa vendimin: pse u shpuan barkun grave shtatzëna të Galaadit për t’i shtrirë kufijtë e vet,

¹⁴do tu jap zjarr mureve të Rabës pallatet do t’ia përpijë në ulërimën e ditës së luftës, në ditë të vorbullës e të stuhisë,

¹⁵mbreti i tyre do të shkojë në skllavëri, ai, e me të, princat e tij!”, është fjala e Zotit.