Prej vdekjes në jetë, Një gjë e vetme në Krishtin

¹Edhe ju ishit të vdekur për shkak të fajeve e të mëkateve tuaja,

²në të cilat dikur keni jetuar, kur ndiqnit parimet e këtij shekulli, të prijësit që sundon mes qiellit e të tokës, simbas atij shpirti që tani vepron në bijtë e padëgjesës…

³Ndër ta edhe ne dikur jetonim në prirjet e prujta të mishit e të gjakut tonë duke i kënaqur epshet e mishit e të sedres dhe, prej natyre, ishim edhe ne, si tjerët, bij të lëshuar në dorë të hidhërimit.

⁴Porse Hyji, i pasur me mëshirë, në saje të dashurisë së madhe, me të cilën na deshi,

⁵ne që ishim të vdekur për shkak të fajeve, na ngjalli bashkë me Krishtin - ju jeni të shëlbuar me hir -

⁶dhe, bashkë me të na ngjalli dhe na vendosi në qiell në Krishtin Jezus:

⁷që me mirësinë e tij ndaj neve në Jezu Krishtin ta tregojë në shekujt e ardhshëm pasurinë e patregueshme të veten.

⁸Sepse me hir, në saje të fesë, jeni shëlbuar! Dhe kjo s’vjen prej jush, por është dhuratë e Hyjit!

⁹E jo me anë të vepravet që ndokush të mos lavdërohet.

¹⁰Jemi vepër e tij, të krijuar në Krishtin Jezus për vepra të mira, që Hyji i përgatiti qysh më para që të jetojmë në to.

¹¹Këndej le t’ju bjerë në mend se dikur ishit paganë në trup quheshit »të parrethprerë« prej atyre që mbahen të rrethprerë, me dorë, në trup!

¹²Le t’ju bjerë në mend se në atë kohë ishit pa Mesinë, të përjashtuar nga nënshtetësia e Izraelit, të huaj për Besëlidhjet e premtimit, ishit të pashpresë e të pahyj në botë.

¹³Por tani, në Jezu Krishtin, ju që ishit ‘larg’ erdhët ‘ngjat’ - në saje të gjakut të Krishtit.

¹⁴Përnjëmend Ai është Paqja jonë, Ai që prej dy popujve bëri një e përmbysi murin ndarës d.m.th. armiqësinë - në trupin e vet.

¹⁵Ai e shfuqizoi Ligjin e urdhërimeve me të gjitha rregulloret, me qëllim që prej dyve: paganëve e hebrenjve, të trajtonte në vetvete një njeri të ri e, duke vendosur paqen,

¹⁶të dy t’i pajtonte në një trup me Hyjin me anë të kryqit duke e asgjësuar në vetvete armiqësinë.

¹⁷E prandaj erdhi t’ju kumtojë paqen juve që ishit larg paqen edhe atyre që ishin ngjat.

¹⁸Në saje të tij, pra, si njëra palë ashtu edhe tjetra, kemi të drejtë të dalim para Atit në fuqi të të njëjtit Shpirt Shenjt.

¹⁹Prandaj, nuk jeni më të huaj e mërgimtarë, por jeni bashkëqytetarë të shenjtërvet dhe anëtarë të familjes së Hyjit,

²⁰të ndërtuar mbi themelin e vërtetë që janë apostujt e profetët, ku guri i këndit që mban gjithçka, është vetë Jezusi Mesi.

²¹Në Të mbarë ndërtesa është e lidhur dhe rritet në tempull të shenjtë në Zotin.

²²Në të edhe ju jeni bërë pjesë e ndërtesës së përbashkët që të bëheni në Shpirtin Shenjt banesë e Hyjit.