Estera paraqitet në pallat

¹Të tretën ditë, Estera u vesh me petkat e mbretëreshës, qëndroi në këmbë në tremen e pallatit mbretëror, brenda, përballë sallonit të mbretit. Ai rrinte në fronin e vet në mbledhjen e pallatit me fytyrë përballë derës.

²Si e pa mbretëreshën Ester ashtu në këmbë, i pëlqeu syve të tij, e shtriu në drejtim të saj shkopin e artë mbretëror që e mbante në dorë. Ajo u afrua dhe e preku majën e shkopit të tij.

²E shndritshme në petkun e mbretëreshës, pasi e kishte thirrur në ndihmë Hyjin, drejtuesin dhe shëlbuesin e të gjithëve, i mori me vete dy nga shërbëtoret e veta.

²Ëmbël mbi njërën mbështetej,

²kurse tjetra e ndiqte zonjën duke ia mbajtur kindin e petkut që i prekte në tokë.

²Kurse ajo, me fytyrë të përshkuar nga ngjyra e trëndafilit e, nën sy të ëmbël e të shndritshëm, fshihte shpirtin e trishtuar dhe të ndrydhur nga frika e vdekjes.

²Si hyri, pra, renderendas nëpër të gjitha dyert, qëndroi në sallën e brendshme para mbretit, ku ai rrinte në fronin e vet mbretëror; i veshur me petkat mbretërore shkëlqente në ar e në gurë të paçmueshëm: ishte në fytyrë i tmerrshëm e në dorë e kishte shkopin e artë mbretëror.

²Porsa i lartësoi sytë, e shikoi atë si mëzati i hidhëruar që do ta mësynte për ta dëmtuar, dhe bërtiti i rrezikshëm: “Kush ka guxuar të hyjë në sallon pa qenë i thirrur?” Mbretëreshën e lëshuan këmbët, u zbeh në fytyrë, e këputur, u mbështet në kokën e shërbëtores që i printe.

²Por Hyji i judenjve, Zoti i të gjitha krijesave, e zbuti shpirtin e mbretit, i cili vrik kërceu plot frikë nga froni, e mori Esterën para duarsh deri që ajo u kthye në vete duke e përkëdhelur me fjalë të ëmbla:

²“Ç’ke, mbretëreshë Ester, motra ime, bashkëshorte në mbretëri? Jam unë, vëllai yt, mos ki frikë!

²S’do të vdesësh! Ky ligj s’është bërë për ty, por për të gjithë të tjerët.

²Afrohu”!

²E lartësoi skeptrin e vet të artë, e vuri në qafën e saj, e përqafoi e i tha: “Fol me mua”!

²Ajo iu përgjigj: “Të shikova, Imzot, e mu duke si engjëlli i Hyjit. Zemra mu trand nga shkëlqimi i madhërisë sate,

²sepse je përtej mase i mrekullueshëm, Imzot, e fytyra jote veç hir kullon”!

²Ndërsa po fliste, përsëri u pak e gati i doli shpirti.

²Mbreti u shqetësua si edhe të gjithë shërbëtorët e tij.

³Atëherë mbreti i tha: “Çfarë dëshiron, mbretëreshë Ester? Cila është kërkesa jote? Nëse do të ma kërkosh edhe gjysmën e mbretërisë, do ta jap”.

⁴Ajo iu përgjigj: “Po të lutem, nëse i pëlqen mbretit, eja sot tek unë ti bashkë me Amanin në gostinë që e kam bërë gati”.

⁵Mbreti menjëherë urdhëroi: “Thirrene shpejt Amanin që ti plotësohet dëshira Esterës”. Kështu, pra, erdhën mbreti e Amani në gostinë që e kishte bërë gati mbretëresha.

⁶Pasi mbreti kishte pirë verë, tha: “Çfarë kërkon, se ta dhashë! Cila është ajo gjë që e dëshiron? Qoftë edhe gjysma e mbretërisë sime, do të të jepet”.

⁷Estera iu përgjigj: “Kërkesa ime dhe lutja është:

⁸Nëse kam gjetur hir para mbretit e në qoftë se mbretit i pëlqen të ma kryejë çka kërkoj e të ma plotësojë lutjen time, ta ketë mirësinë mbreti e Amani e të vijnë në gosti që do tua bëj gati nesër e atëherë do ti përgjigj mbretit për çka po më pyet”.

⁹Atë ditëAmani doli shend e verë, por u hidhërua shumë, kur pa se Mardokeu që po rrinte në derën e pallatit jo vetëm se nuk u ngrit për ta përshëndetur me përulje, por as që luajti nga vendi ku kishte ndenjur.

¹⁰Megjithatë u përmbajt. Kur shkoi në shtëpinë e vet, i bashkoi miqtë, e thirri edhe gruan e vet Zaresën

¹¹ua tregoi shkëlqimin e pasurive të veta, u foli për djemtë e vet të shumtë e për nderin e madh, në të cilin e kishte ngritur mbreti përmbi të gjithë oborrtarët dhe zyrtarët e mbretit.

¹²E pas këtyre, shtoi: “Po edhe mbretëresha Ester sthirri në gosti bashkë me mbretin askënd tjetër përveç meje. Tek ajo edhe nesër do të shkoj në banket bashkë me mbretin.

¹³Por, megjithëse i kam të gjitha këto, më duket se nuk kam asgjë deri sa ta shikoj çifutin Mardoke duke ndenjur në derën e mbretit”.

¹⁴I përgjigjën Zaresa, gruaja e tij, dhe miqtë e tjerë: “Jep urdhër të vihet një tra i gjatë, i lartë pesëdhjetë kute dhe nesër në mëngjes kërko prej mbretit që të varet në të Mardokeu, e kështu do të shkosh i kënaqur në gosti me mbretin”. Amanit i pëlqeu këshilla dhe urdhëroi të bëhet gati trau.