Shëmbëlltyra me vreshtin

¹Më qe drejtuar kjo fjalë e Zotit:

²»Biri i njeriut, ç’vlerë më të madhe ka druri i hardhisë se lëndët e tjera të pyllit?

³Pse a përdoret druri i saj për të gdhendur ndonjë send? Ose a punohet prej saj ndonjë gozhdë që të varet ndonjë send në të?

⁴Ja, në zjarr qitet që të digjet: kur zjarri t’ia djegë dy skajet edhe mesi t’i jetë shkrumbuar, a thua atëherë vlen për punim?!

⁵As kur ishte e tërë prej saj gjë s’mundej të punohet; aq më pak kur ta djegë, ta përpijë zjarri, s’mund të punohet me të kurrgjë.

⁶Prandaj kështu thotë Zoti Hyj: Porsi druri i hardhisë ndër lëndë të tjera të pyllit, që në zjarr e qita ta përpijë, ashtu i qita banorët e Jerusalemit!

⁷Faqen time e solla kundër tyre! Prej zjarri ata kanë dalë, prapë zjarri do t’i përpijë. Do ta dini se unë jam Zoti, kur të sillem kundër tyre,

⁸kur mbarë vendin ta bëj të shkretë pse s’ma ruajtën besnikërinë - është fjala e Zotit Hyj.«