II. PROFECI KUNDËR PAGANËVE, Kundër amonitëve, etj.

¹Më qe drejtuar kjo fjalë e Zoti:

²»Biri i njeriut, sillu me fytyrë kah amonitët e parafol kundër tyre.

³Thuaju bijve të Amonit: Dëgjojeni fjalën e Zotit Hyj! Kështu thotë Zoti Hyj: Pse thatë ‘Mirë e ka!’ për Shenjtëroren time pse e çnderuan e për tokën e Izraelit pse e shkretuan e për shtëpinë e Judës pse i morën skllevër,

⁴për këtë arsye unë do të të dorëzoj bijve të lindjes për pronë. Në ty do t’i ngulin banishtat dhe çadrat e veta: ata do t’i hanë frytet e prodhimeve të tua e do ta pinë qumështin tënd.

⁵Rabatin do ta bëj kullotë gamilesh e tokën e bijve të Amonit vathë bagëtish e do ta dini se unë jam Zoti.

⁶Sepse kështu thotë Zoti Hyj: Pse duartrokite, pse rrahe me këmbë e pse me gjithë shpirt u kënaqe në lidhje me tokën e Izraelit,

⁷këndej edhe vetë do ta çoj dorën time kundër teje, do të të bëj pre popujsh, do ta tres farën ndër popuj, do të të zhduk nga gjiri i popujve, do të të zhbij krejtësisht e atëherë do të shohësh se unë jam Zoti.«

⁸Kështu thotë Zoti Hyj: »Pasi Moabi e Seiri thanë: ‘Ja, pra, shtëpia e Izraelit është si të gjithë popujtë’,

⁹e mirë, unë do t’ia hap ijën Moabit, unë do ta lë pa qytetet, pa qytete po them të tija në mbarë vendin e tij, që janë stolia e vendit: pa Betiesimotin, pa Baalmeonin, pa Kariataimin.

¹⁰Do ta lëshoj në duar të bijve të Lindjes për pronë së bashku me amonitët, që bijtë e Amonit të mos përmenden më ndër popuj.

¹¹Kështu do ta kryej gjyqin mbi Moabin e do ta dinë se unë jam Zoti.«

¹²Kështu thotë Zoti Hyj: »Pasi Idumeja u hakmor kundër shtëpisë së Judës e me këtë hakmarrje mëkatoi rëndë duke kërkuar prej tyre ahmarrje,

¹³prandaj kështu thotë Zoti Hyj: Do ta shtrij dorën time kundër Idumesë dhe do të zhduk prej saj njerëz e kafshë. Do ta kthej në shkretëtirë: nga Temani deri në Dedan të gjithë do të bien nga shpata.

¹⁴Kështu do t’i ahmerrem Idumesë me anë të dorës së popullit tim Izraelit. Ata do të sillen me Edomin sipas furisë e felgrimit tim e do ta njohin ahmarrjen time - thotë Zoti Hyj.«

¹⁵Kështu thotë Zoti Hyj: »Pasi filistinët vepruan me ahmarrje dhe u ahmorën me tërbim duke vrarë dhe e çuan në vend armiqësinë e përhershme,

¹⁶prandaj kështu thotë Zoti Hyj: Ja, unë po e çoj dorën time kundër palestinezëve: do t’i vras ceretenjtë, do t’i zhbij të gjitha tepricat e bregut të detit!

¹⁷Kështu do të bëj kundër tyre një ahmarrje emnesë duke i ndëshkuar me tërbim e, kur ta kem kryer ahmarrjen time, atëherë do ta dinë se unë jam Zoti.«