Paralajmërim se do të rrethohet Jerusalemi

¹»E ti, biri i njeriut, merre një tullë, vëre para vetes e vizatoje në të qytetin e Jerusalemit.

²Përreth tij vëre rrethimin, ndërtoje përballë tij një fortesë, punoje llogorin, vendose kundër tij ushtrinë e renditi rreth e rreth deshtë.

³Merre fulteren e hekurt e vëre në murin e hekurt ndërmjet teje e qytetit, sille fytyrën drejt tij dhe qyteti do të jetë i rrethuar, dhe bëji rrethim. Kjo do të jetë shenjë për shtëpinë e Izraelit.

⁴Atëherë bjer në krahun tënd të majtë dhe vëri fajësitë e shtëpisë së Izraelit mbi të: sa ditë do të rrish ratë ashtu, aq ditë do t’i mbartësh mëkatet e tyre.

⁵Po të caktoj një ditë për vjetët e fajësisë së tyre: për treqind e nëntëdhjetë ditë do ta mbartësh fajësinë e shtëpisë së Izraelit.

⁶Kur t’i kesh kryer këto, shtriju në anën e djathtë të dytën herë dhe do t’i marrësh mbi vete fajet e shtëpisë së Judës për dyzet ditë: një ditë për një vjet, mbaje mend, po të caktoj.

⁷Atëherë sille fytyrën tënde në drejtim të Jerusalemit të rrethuar, krahu yt le të jetë i zhveshur dhe profetizo kundër tij.

⁸Dhe ja, unë do të lidh me litarë e mos u sill nga një krah në tjetrin deri që t’i kesh kryer ditët e rrethimit tënd.

⁹Merr grurë, elb, bathë, thjerrë, mel, tepë dhe qiti të gjitha në një enë dhe përgatit prej tyre bukë për vete për aq ditë sa të rrish mbi krahun tënd: dhe haji gjatë treqind e nëntëdhjetë ditëve.

¹⁰Ushqimi yt do të jetë me peshë njëzet siklash në ditë; dhe haje në një kohë të caktuar.

¹¹Edhe ujët pije me masë: të gjashtën pjesë të hinit; pije në kohë të caktuar.

¹²Dhe haje si bukën e elbit të pjekur në hi dhe piqe ndër sy të tyre në zjarr të përftuar nga tretjet që dalin nga njeriu.«

¹³Mandej Zoti shtoi: »Kështu bijtë e Izraelit do ta hanë bukën e vet të ndyrë ndër paganë ku unë do t’i tres.«

¹⁴Atëherë unë i thashë: »Heu, o Zot Hyj, shpirti im nuk është i ndyrë! Qysh prej fëmijërisë sime e deri më sot kurrë nuk hëngra coftinë as kafshë të copëtuar nga egërsira, kurrë s’hyri në gojën time mish i papastër!«

¹⁵Atëherë më tha: »Ja, po të jap në vend të tretjeve të njerëzve bajgën e lopëve: piqe me bajga bukën tënde!«

¹⁶Dhe më shtoi: »Biri i njeriut, ja unë po e sos kursimin e fundit të bukës në Jerusalem: do ta hanë bukën e peshuar imtësisht e me kujdes, edhe ujët do ta pinë me masë e me mangësi,

¹⁷kështu që, duke munguar buka e ujët, do të meken të gjithë së bashku e do të sharrojnë në fajësinë e vet.