Ndarja e vendit, Dyert e Jerusalemit, etj.

¹Ja emrat e fiseve: Nga kufiri i veriut, në drejtim të Hetalonit, në hyrje të Ematit, Asarenon, në veri për kufi të Damaskut, përgjatë kufirit të Ematit - nga krahu i lindjes deri në det: pjesa e Danit, një pjesë.

²Nga kufiri i Danit - nga kufiri lindor deri në kufirin e detit: pjesa e Aserit, një pjesë.

³Përgjatë kufirit të Aserit, prej lindjes e deri në det: pjesa e Neftaliut, një pjesë.

⁴Përgjatë kufirit të Neftaliut, prej lindjes e deri në det pjesa e Manaseut, një pjesë.

⁵Përgjatë kufirit të Manaseut, prej lindjes e deri në det: pjesa e Efraimit.

⁶Përgjatë kufirit të Efraimit, prej lindjes e deri në det: pjesa e Rubenit.

⁷Përgjatë kufirit të Rubenit, prej lindjes e deri në det: pjesa e Judës.

⁸Përgjatë kufirit të Judës, prej lindjes e deri në det le të jetë pjesë e veçuar që do t’ia kushtoni Zotit: gjerë e gjatë: njëzet e pesë mijë kute, sikurse edhe çdo pjesë, prej lindjes e deri në det: në mesin e saj do të jetë shenjtërorja.

⁹Pjesa që do ta veçoni për Zotin, le të jetë e gjatë njëzet e pesë mijë kute dhe e gjerë njëzet mijë.

¹⁰Kjo pjesë e veçuar u takon këtyre: priftërinjve: në veri njëzet e pesë mijë kute; në perëndim dhjetë mijë kute gjerë, në lindje dhjetë mijë kute gjerë e në jug njëzet e pesë mijë kute gjatë; në mes le të jetë Shenjtërorja e Zotit.

¹¹Priftërinjve të shuguruar - bijve të Sadokut, të cilët i ruajtën rregulloret e mia e nuk gabuan, kur e morën udhën e mbrapshtë bijtë e Izraelit, siç gabuan edhe vetë levitët:

¹²atyre u takon një pjesë nga kjo pjesë e veçuar, pjesa më e shenjtë, përgjatë kufirit të pjesës së levitëve.

¹³Po edhe levitëve shi sikurse pjesës së priftërinjve: njëzet e pesë mijë kute gjatë e dhjetë mijë kute gjerë - gjithsej njëzet e pesë mijë kute gjatë e dhjetë mijë kute gjerë.

¹⁴Prej kësaj pjese asgjë s’mund të shitet, s’mund të ndërrohet, s’mund të kalohet në askënd toka e Veçuar, sepse është e shuguruar Zotit.

¹⁵Pesë mijë kute në gjerësi, që teprojnë nga ato njëzet e pesë mijë, le të jenë kujri: për qytet, për banim e për kullota: qyteti le të jetë në midis.

¹⁶Ja, masat e saj: në veri pesëqind e katër mijë, në jug pesëqind e katër mijë, në lindje pesëqind e katër mijë dhe në perëndim pesëqind e katër mijë kute.

¹⁷Kullotat e qytetit duhet të jenë: në veri dyqind e pesëdhjetë kute, në jug dyqind e pesëdhjetë kute, në lindje dyqind e pesëdhjetë kute e në krah të detit dyqind e pesëdhjetë kute.

¹⁸Çka, pastaj, të teprojë përgjatë pjesës së shenjtë - dhjetë mijë kute në anë të lindjes e dhjetë mijë në perëndim, gjatë pjesës së shenjtë - prodhimet e saja do t’u jepen atyre që i shërbejnë qytetit për ushqim.

¹⁹Shërbyesit e qytetit le të merren nga të gjitha fiset e Izraelit.

²⁰E tëra pjesë e veçuar, pra, njëzet e pesë mijë kute herë njëzet e pesë mijë: katrore. Do t’i veçoni pjesën e shenjtëruar Zotit dhe pronën e qytetit.

²¹Pjesa që tepron i përket princit në të dy anët e pjesës së shuguruar dhe të pjesës së pronës së qytetit - në krahun e lindjes njëzet e pesë mijë kute, në krahun e lindjes, e në krahun e perëndimit njëzet e pesë mijë kute deri në kufi me det, sipas pjesëve të fiseve - i takon princit. Pjesa e shuguruar e Shenjtërorja e Tempullit le të jetë në mes,

²²e ndarë nga prona e levitëve e nga prona e qytetit, ndërmjet Judës e Beniaminit, është prona e princit.

²³Fiseve të tjera: nga lindja në perëndim: pjesa e Beniaminit.

²⁴Gjatë kufirit të Beniaminit prej lindjes në perëndim: pjesa e Simonit.

²⁵Për kufi të Simonit, prej lindjes në perëndim: pjesa e Isaharit.

²⁶Për kufi të Isaharit, prej lindjes në perëndim: pjesa e Zabulonit.

²⁷Për kufi të Zabulonit, prej lindjes deri në bregun e detit: pjesa e Gadit.

²⁸Për kufi të Gadit, prej lindjes në anë të jugut, në drejtim të jugut kufiri kalon prej Tamarës deri në ujërat Meribatkades, përgjatë përroit deri në Detin e Madh.

²⁹Kjo është toka për të cilën do të qitni short për fiset e Izraelit, këto janë pjesët e tyre - thotë Zoti Hyj.

³⁰Këto janë daljet e Qytetit: në krahun e veriut - masa e së cilës është pesëqind e katër mijë kute,

³¹dyert e Qytetit do të quhen me emër të fiseve të Izraelit. Tri dyer në veri: Dera e Rubenit, Dera e Judës e Dera e Levit.

³²Në anën e lindjes - pesëqind e katër mijë - tri dyer: Dera e Jozefit, Dera e Beniaminit e Dera e Danit.

³³Në anën e mesditës - masa e së cilës pesëqind e katër mijë - tri dyer: Dera e Simonit, Dersa e Isaharit e Dera e Zabulonit.

³⁴Në anën e perëndimit - pesëqind e katër mijë - tri dyer: Dera e Gadit, Dera e Aserit e dera e Neftaliut.

³⁵Gjithsej rreth e rreth: tetëmbëdhjetë mijë kute.