Udha e vërtetë e shëlbimit, Vrapimi drejt qëllimit

¹Përndryshe, vëllezërit e mi, gëzohuni në Zotin! T’ju shkruaj të njëjtat gjëra unë nuk e kam vështirë, kurse për ju është përforcim:

²Ruanu prej »qenve«! Ruanu prej punëtorëve të këqij! Ruanu prej rrethprerjes gjymtuese!

³Sepse, ne jemi të rrethprerët »e vërtetë«, ne që në Shpirtin e Hyjit kryejmë shërbesën hyjnore dhe mburremi në Krishtin Jezus dhe nuk shpresojmë në trup.

⁴Megjithatë, unë do të mund të shpresoja edhe në trup, sepse, në mendoftë ndokush se ka arsye të shpresojë në trup - unë edhe më tepër!

⁵I rrethprerë të tetën ditë, izraelit me kombësi, nga fisi i Beniaminit, hebre prej hebrenjsh; sipas Ligjit farise;

⁶për kah zelli, salvues i Kishës e, për sa i përket drejtësisë - asaj të Ligjit - i patëmetë.

⁷Por të gjitha këto që i mbaja si përparësi, tani i çmoj si një bjerrje për shkak të Krishtit.

⁸Madje unë çmoj gjithçka si dëm në krahasim me më të madhen të mirë: me njohjen e Jezu Krishtit, Zotit tim. Për të kam bjerrë çdo gjë dhe të gjitha i çmoj si llom, me qëllim që të fitoj Krishtin

⁹dhe të gjendem në Të - jo me drejtësinë time - me atë që vjen nga Ligji, por me atë që vjen nga feja në Krishtin, me drejtësinë që vjen nga Hyji, e themeluar në fe -

¹⁰që ta njoh atë dhe fuqinë e ngjalljes së tij me pjesëmarrjen në vuajtjet e tija, që të bëhem i ngjashëm me Të në vdekjen e tij,

¹¹që në ndonjë mënyrë të mund t’ia arrij ngjalljes së të vdekurve.

¹²Jo, sikurse t’ia kisha arritur, as, sikurse të isha bërë i përsosur, por - vrapoj që, në ndonjë mënyrë, të mund ta zë, sepse edhe vetë kam qenë zënë prej Krishtit [Jezus].

¹³Vëllezër, unë nuk mendoj se ia kam arritur, di vetëm kaq: harroj çka kam lënë pas dhe zgjatem drejt të së ardhmes,

¹⁴sulem drejt qëllimit, drejt shpërblimit të thirrjes qiellore të Hyjit në Krishtin Jezus.

¹⁵Ne, pra, që ia kemi arritur »pjekurisë«, ta kemi në mendje këtë gjë! Po, nëse e mendoni ndryshe, shi kështu Hyji do t’jua zbulojë.

¹⁶Ndërkaq, prej asaj pike ku kemi arritur - të vazhdojmë të përparojmë asaj hullie.

¹⁷Më përngjani mua, o vëllezër, dhe vëreni ata që jetojnë simbas shembullit që keni në ne.

¹⁸Sepse, sikurse ju kam thënë shpesh herë e tani po jua them me lot për faqe, shumë jetojnë si armiq të kryqit të Krishtit!

¹⁹Mbarimi i jetës së tyre është dënimi, hyji i tyre është barku dhe lavdia e tyre në turp - ata mendojnë vetëm gjërat tokësore.

²⁰Kurse Atdheu ynë është qielli, nga presim se vjen si Shëlbues Jezu Krishti Zot.

²¹Ai do ta shndërrojë trupin tonë të mjerë në një trup të ngjashëm me trupin e tij të lavdishëm në saje të pushtetit që ka të nënshtrojë nën sundimin e vet gjithçka.