Qortime, Falënderim filipianëve për ndihma, etj.

¹Prandaj, vëllezërit e mi të dashur që aq fort ju kam për zemër, gëzimi dhe kurora ime, kështu pra, - qëndroni të fortë në Zotin.

²E porosis Evodinë dhe e përbetoj Sintikën të jetojnë në përkim në Zotin.

³Po të lutem edhe ty, Shok i dashur, ndihmoju sepse ato luftuan bashkë me mua për Ungjill, së bashku me Klementin dhe me bashkëpunëtorët e mi, emrat e të cilëve gjenden në »librin e jetës«.

⁴Gëzohuni gjithmonë në Zotin, rishtas po ju them: gëzohuni!

⁵Mirësinë tuaj le ta njohin të gjithë njerëzit! Zoti është ngjat!

⁶Për asgjë mos u shqetësoni, por gjithçka - me lutje dhe me urata të përcjella me falënderim - paraqitni Hyjit nevojat tuaja!

⁷Dhe paqja e Hyjit, që është më e vlershme se mund ta mendojmë do t’i ruajë zemrat tuaja dhe mendimet tuaja në Krishtin Jezus.

⁸Së fundi, o vëllezër, mundohuni të keni për zemër gjithçka është e vërtetë, gjithçka është e ndershme, gjithçka është e drejtë, gjithçka është e pastër, gjithçka është e shenjtë, gjithçka është e denjë për dashuri, gjithçka është e denjë për lavdi, gjithçka është virtyt.

⁹Çka keni mësuar, çka keni marrë, çka keni dëgjuar dhe parë në mua - atë bëni - dhe Hyji që jep paqen do të jetë me ju.

¹⁰Tesve jam gëzuar në Zotin, pse kujdesi juaj ndaj meje mundi së fundi të lulëzojë. Vërtet, ju edhe më parë keni menduar të kujdeseni për mua, por nuk keni pasur rast.

¹¹Nuk po them kështu për arsye të skamit, sepse ju e dini se unë jam mësuar të jem i kënaqur me aq sa kam.

¹²Di të jetoj në skam dhe di të jetoj në pasje. Jam mësuar gjithsi dhe për gjithçka: të ngihem e të jem i uritur, të kem mjaft e të kem pak!

¹³Gjithçka mundem me ndihmën e Atij që më jep fuqi!

¹⁴Por, prapëseprapë, është bukur për ju që morët pjesë në nevojën time.

¹⁵Po edhe ju, o filipianë, e dini mirë se në fillim të predikimit të Ungjillit, kur u nisa prej Maqedonisë, asnjë kishë nuk më dha gjë lidhur me »të dala e të marra«, përveç ju të vetmit.

¹⁶Madje edhe në Selanik kur isha në nevojë, më dërguat ndihma një herë e dy herë.

¹⁷Jo, nuk kërkoj dhurata, por kërkoj fryt të begatshëm në dobinë tuaj.

¹⁸Kam gjithçka më duhet, madje edhe për së tepërmi: jam plot me çdo të mirë që mora prej Epafroditit, çka ju më dërguat: »erë e mirë« - fli e erëndshme që i pëlqen Hyjit.

¹⁹Dhe Hyji im do të plotësojë çdo nevojë tuajën me begatinë e vet, për mrekulli, nëpër Jezu Krishtin.

²⁰Hyjit, Atit tonë, i qoftë çdo lavdi në shekuj të shekujve. Amen.

²¹Përshëndetni çdo shenjt në Jezu Krishtin! Vëllezërit që janë me mua ju bëjnë të fala.

²²Ju bëjnë të fala të gjithë shenjtërit, sidomos ata që janë të pallatit të perandorit.

²³Hiri i Zotit tonë Jezu Krishtit qoftë me shpirtrat tuaj!