Përshëndetje, Pali falënderon Hyjin për kolosianët, etj.

¹Pali, për vullnet të Hyjit apostulli i Krishtit Jezus edhe vëllai Timote:

²shenjtërve që janë në Kolos, vëllezërve besimtarë në Krishtin: Hyji, Ati ynë, ju dhëntë hir e paqe!

³E falënderojmë Hyjin, Atin e Zotit tonë Jezu Krishtit dhe lutemi vazhdimisht për ju,

⁴sepse morëm vesh për fenë tuaj në Jezu Krishtin dhe për dashurinë që keni ndaj të gjithë shenjtërve,

⁵për arsye të shpresës që ruhet për ju në qiell. Për të keni dëgjuar në saje të fjalës së vërtetës - Ungjillit,

⁶që arriti te ju dhe po jep fryte e po zhvillohet, si në mbarë botën, ashtu edhe ndër ju, qysh prej ditës kur dëgjuat dhe e njohët hirin e Hyjit me anë të së vërtetës,

⁷ashtu si e keni mësuar prej Epafrit të dashur, shokut tonë në shërbesë. Ai na zëvendëson ndër ju si mbarështues besnik i Krishtit.

⁸Ai edhe na njoftoi për dashurinë tuaj në Shpirtin Shenjt.

⁹Prandaj edhe ne, qysh atë ditë, kur morëm vesh për këtë gjë, nuk pushojmë të lutemi për ju dhe të kërkojmë prej Hyjit të fitoni me çdo urti e kuptim shpirtëror njohurinë e plotë të vullnetit të tij,

¹⁰që të jetoni në mënyrë të denjë për Zotin dhe t’i pëlqeni Atij plotësisht, duke dhënë fryte veprash të mira dhe duke përparuar në njohurinë e Hyjit,

¹¹që të forcuar me çdo fuqi si i përgjigj pushtetit të Hyjnisë së tij, të jeni të fortë e të durueshëm në çdo provë, që me gëzim

¹²ta falënderoni Atin, i cili ju bëri të aftë të keni pjesë në trashëgimin e shenjtërve në dritë.

¹³Ai na nxori nga pushteti i errësirës dhe na kaloi në Mbretërinë e Birit të vet të dashur,

¹⁴në të cilin kemi shpërblimin - faljen e mëkateve.

¹⁵Ai është shëmbëllesa e Hyjit të papashëm, i Parëlinduri - para çdo krijese.

¹⁶Sepse në Të u krijua çdo gjë në qiell e në dhe, çka shihet e çka nuk shihet: qoftë Tronet, qoftë Zotërimet, qoftë Principatet, qoftë Pushtetet - gjithçka u krijua nëpër Të dhe për Të.

¹⁷Ai është para çdo gjëje dhe çdo gjë qëndron në Të.

¹⁸Ai është Kryet e Trupit - Kishës; Ai është Fillimi, i Parëlinduri ndër të vdekurit - që të jetë në gjithçka i Pari.

¹⁹Sepse Hyjit i pëlqeu të banojë në Të e tërë Plotësia dhe, me anë të Tij,

²⁰- duke vendosur paqen me anë të gjakut të kryqit [të Tij] - të pajtojë me vete gjithçka qoftë në tokë qoftë në qiell.

²¹Edhe ju që dikur ishit të përjashtuar dhe armiq për shkak të veprave tuaja të këqija,

²²tani Hyji ju pajtoi me vete në saje të trupit të vdekshëm të Krishtit - nëpër vdekje - që t’ju qesë para Tij të shenjtë, të drejtë e të patëmetë.

²³Por duhet të qëndroni të themeluar në fe, të qëndrueshëm dhe të palëkundshëm në shpresën që jep Ungjilli, për të cilin dëgjuat, i cili u predikua secilës krijesë nën qiell. Këtij Ungjilli unë Pali iu bëra mbarështues.

²⁴Dhe tani vetë ju gëzohem vuajtjeve të mia për të mirën tuaj dhe plotësoj në trupin tim çka u mungon mundimeve të Krishtit për Trupin e tij - Kishën.

²⁵U bëra mbarështues i Saj në fuqi të misionit që Hyji më caktoi për të mirën tuaj që ta bëj të njohur njëherë e përgjithmonë Fjalën e Hyjit:

²⁶- Misterin e mbajtur fshehur gjatë shekujsh dhe breznish, të cilin tani ua zbuloi shenjtërve të tij.

²⁷Këtyre Hyji deshi t’ua njoftojë lavdinë e begatshme të këtij Misteri në paganë: d.m.th.: Krishti është ndër ju, shpresa e lavdisë!

²⁸Ne kumtojmë Atë. Qortojmë çdo njeri dhe mësojmë gjithkënd me çdo njohuri për të bërë që gjithkush t’ia arrijë përsosmërisë në Krishtin.

²⁹Për këtë arsye edhe mundohem dhe luftoj me ndihmën e fuqisë së tij i cili me plot fuqi vepron në mua në mënyrë të pushtetshme.