Begatia e jetës në Krishtin, Jeta e re në Krishtin

¹Këndej dëshiroj ta dini se ç’luftë të ashpër më duhet të bëj për ju, për ata në Laodice edhe për të gjithë tjerët që nuk më kanë parë kurrë personalisht,

²që të ngushëllohen zemrat e tyre dhe, të bashkuar në dashuri t’ia arrijnë tërë begatisë, plotësisë së kuptimit, njohjes së vërtetë të Misterit të Hyjit - Krishtit.

³Në Të janë të fshehura të gjitha visaret e dijes e të kuptimit.

⁴Ju them këtë që askush të mos ju gënjejë me fjalë joshëse.

⁵Edhe pse me trup nuk jam i pranishëm, megjithatë me shpirt jam ndër ju: me kënaqësi e vërej radhën tuaj dhe patrandshmërinë e besimit tuaj në Krishtin.

⁶Sikurse e pranuat Jezu Krishtin Zot, ashtu edhe vazhdoni të jetoni në Të:

⁷të rrënjosur, vazhdimisht të mbimuruar në të dhe të fortë në fe sikurse qetë mësuar, gjithherë përplot me falënderim.

⁸Ruanu të mos ju gënjejë kush me anë të »filozofisë« - me stërhollime të kota, që bazohen në thashethënat njerëzore, në »elementet e botës« e jo në Krishtin.

⁹Dhe, pasi në Krishtin banon trupërisht e tërë plotësia hyjnore, kështu edhe ju jeni

¹⁰të mbushur me anë të Tij. Ai është Kryet e çdo Principate e Pushteti.

¹¹Në të jeni edhe të rrethprerë, por me një rrethprerje që s’është bërë me dorë njeriu - u zhveshët nga trupi i mëkatit - me anë të rrethprerjes së Krishtit.

¹²Të varrosur bashkë me Të në pagëzim, bashkë me Të edhe u ngjallët në saje të fesë, me të cilën besuat në fuqinë e Hyjit që e ngjalli nga të vdekurit.

¹³Edhe juve që ishit të vdekur për shkak të fajeve tuaja dhe të parrethprerjes së trupit tuaj, Hyji ju ngjalli bashkë me Të. Ai mirësisht na i fali të gjitha fajet tona,

¹⁴Ai e zhvleftësoi dëftesën paditëse që, në saje të urdhërimeve, ishte kundër nesh, e bëri të zhduket, e mbërtheu në kryq.

¹⁵I çarmatosi Principatet dhe Pushtetet - e dëftoi këtë botërisht - dhe i hoq zvarrë në kalimin ngadhënjyes të Kryqit!

¹⁶Prandaj askush të mos guxojë t’ju dënojë për çështje ushqimi e pijeje, për çështje festash o hëne së re ose të të shtunash,

¹⁷sepse këto janë vetëm hija e atyre që duhej të vinin, kurse realiteti është Krishti!

¹⁸Askush të mos ju shpallë të padenjë për shpërblim qiellor, pse ai, kinse »kënaqet në përshpirtëri dhe nderim të engjëjve«, kinse është në vegime dhe është themeluar në kujtime shpirtërore dhe në mendjen e vet fryhet për pamje përrallore,

¹⁹por nuk është i lidhur me Krye - me Atë, prej të cilit mbarë Trupi, në saje të gjymtyrëve dhe të nyjeve, i kujdesuar dhe i lidhur në një, rritet me rritjen që jep Hyji.

²⁰Nëse bashkë me Krishtin keni vdekur për parimet e botës, pse atëherë - thua se jeta juaj është ende e varur nga kjo botë, u nënshtroheni disa rregulloreve, si këto:

²¹»Mos merr, mos shijo, mos prek!«

²²Të gjitha këto janë të caktuara të mbarojnë me përdorim! Rregullore dhe mësime njerëzish!

²³Të gjitha këto janë kinse nderim Hyjit, përshpirtëri, kinse pendesë, duken si të ishin vërtet urti, por nuk kanë kurrfarë vlere, vetëm sa për të kënaqur trupin!