Detyrat shoqërore të jetës së re

¹Nëse, pra, u ngjallët bashkë me Krishtin, kërkoni çka është lart, ku gjendet Krishti ndenjur në fron në të djathtën e Hyjit!

²Dëshironi gjërat që janë lart e jo këto përmbi tokë!

³Sepse vdiqët dhe jeta juaj është e fshehur me Krishtin në Hyjin.

⁴E kur të duket Krishti - Jeta juaj, atëherë edhe ju bashkë me Të do të shfaqeni plot lavdi.

⁵Bëni, pra, të vdesin gjymtyrët tuaja, ato tokësoret: fëlligështia, papastria, epshet, dëshirat e këqija, lakmimi i tepruar i pasurisë - ajo idhujtari -

⁶për shkak të tyre vjen hidhërimi i Hyjit [mbi ata që nuk dëgjojnë].

⁷Po, dikur edhe ju ecët kësaj udhe, kur jetuat në këto vese.

⁸Por tani edhe ju flakni larg të gjitha këto: hidhërimin, zemërimin, të keqen, blasfeminë; goja juaj të mos përdorë fjalë të ndyta!

⁹Mos rreni njëri-tjetrin! Ju e zhveshët njeriun e vjetër me veprat e tija

¹⁰dhe veshët njeriun e ri që përtërihet në njohurinë e drejtë në përgjasim të Krijuesit të vet.

¹¹Aty nuk ka më: grek - hebre, rrethprerje - parrethprerje, barbar - skit, skllav - të lirë, por Krishti është gjithçka dhe në të gjithë.

¹²Veshuni, pra, mbasi jeni të zgjedhurit e Hyjit, shenjtër e të dashur me zemër të dhimbshme, me mirësi, me përvujtëri, me butësi, me duresë.

¹³Duroni njëri-tjetrin dhe falni njëri-tjetrin në qoftë se ndokush ka ndonjë ankim kundër tjetrit. Sikurse Zoti ju fali ju, po ashtu bëni edhe ju!

¹⁴E mandej, përmbi të gjitha veshuni me dashurinë! Ajo i mban së bashku të gjitha virtytet.

¹⁵Paqja e Krishtit mbretëroftë në zemrat tuaja - në të cilën edhe jeni të grishur të jeni të gjithë një Trup i vetëm. Dhe jini mirënjohës!

¹⁶Fjala e Krishtit banoftë në ju me tërë begatinë e vet! Mësoni çdo dije dhe këshilloni njëri-tjetrin me plot urti! Këndoni lavde Hyjit me gjithë zemër psalme, himne dhe këngë të përshpirtshme!

¹⁷Çkado që të thoni dhe të bëni, le të jetë në nder të Emrit të Jezusit Zot, duke iu falënderuar me anë të Tij Hyjit Atë.

¹⁸Ju gra, dëgjoni burrat tuaj ashtu si ka hije në Zotin.

¹⁹Ju burra, doni gratë tuaja dhe mos jini me to të vrazhdët!

²⁰Ju fëmijë, dëgjoni prindërit në gjithçka, sepse kjo gjë i pëlqen Zotit.

²¹Ju etër, mos i tutukatni fëmijët tuaj që të mos e humbin guximin.

²²Ju skllevër, dëgjoni zotërinjtë tuaj tokësorë në gjithçka, jo vetëm ndër sy sikurse të doni t’u pëlqeni njerëzve, por me thjeshtësinë e zemrës, me frikën e Zotit.

²³Çfardo pune që të bëni, bëne me vullnet, si ta bëshit për Zotin e jo për njerëz

²⁴të sigurtë se do të merrni prej Zotit trashëgimin si shpërblim. Zotëria është Krishti; shërbeni Atij!

²⁵Patjetër, ai që bën padrejtësi, do të shpaguhet për padrejtësi që bëri. Nuk ka krahambajtje.