Paralajmërimi i rrënimit të Tempullit, Fillimi i të vështirave, etj.

¹Ndërsa po dilte nga Tempulli, i tha njëri prej nxënësve të tij: »Mësues! Shih çfarë gurësh e ç’ndërtesa!«

²Kurse Jezusi i tha: »A po i sheh këto godina madhështore? Nuk do të mbesë as gur mbi gur pa u rrëzuar!«

³Kur mandej u ul të rrijë në Malin e Ullinjve kundruall Tempullit, Pjetri, Jakobi, Gjoni e Andreu e pyetën veçmas:

⁴»Na trego kur do të ndodhin këto dhe cila do të jetë shenja se të gjitha këto do të vërtetohen?«

⁵Atëherë Jezusi nisi t’u flasë: »Vëniani mendjen të mos ju gënjejë kush!

⁶Sepse do të vijnë shumë njerëz në emrin tim e do t’ju thonë: ‘Unë jam!’ dhe do të gënjejnë shumëkënd.

⁷Por edhe kur të dëgjoni për luftëra e për lajme luftërash, mos u shqetësoni! Këto duhet të ndodhin, por as atëherë ende nuk është mbarimi.

⁸Sepse, do të ngritet popull kundër popullit mbretëri kundër mbretërisë, do të ndodhin tërmete në vende të ndryshme e do të ketë uri. Kjo është nisma e vështirësive të tmerrshme.

⁹Por ju kujdesoni veten: do t’ju dorëzojnë gjyqeve, do t’ju frushkullojnë ndër sinagoga do t’ju qesin para qeveritarëve e para mbretërve për shkak timin, që të dëshmoni para tyre.

¹⁰Por më parë duhet t’u shpallet Ungjilli të gjithë popujve.

¹¹Dhe kur t’ju çojnë për t’ju gjykuar, mos u shqetësoni që më parë se çka do të përgjigjni; por flisni ç’t’ju jepet në atë çast, sepse nuk do të flisni ju, por Shpirti Shenjt.

¹²Vëllai do të dorëzojë vëllanë e vet në vdekje e babai fëmijën e vet. Fëmijët do të çohen kundër prindërve dhe do t’i vrasin.

¹³Dhe do t’ju urrejnë të gjithë për shkak të emrit tim. Ai që të qëndrojë deri në fund, do të shëlbohet.«

¹⁴»Kur të shihni ‘Tmerrimin e shkatërrimit’, se qëndron atje ku s’guxon të jetë - kush lexon le ta marrë vesh - atëherë ata që gjenden në Jude, le të ikin në male;

¹⁵ai që ndodhet në pullaz, të mos zbresë e të mos hyjë në shtëpi të vet për të marrë ndonjë send;

¹⁶po edhe ai që të ndodhet në arë, të mos kthehet mbrapa për të marrë mantelin e vet!

¹⁷Mjerë gratë shtatzëna e ato me fëmijë në gji në ato ditë!

¹⁸Lutuni që të mos bjerë në dimër,

¹⁹sepse në ato ditë do të jetë ‘mjerim aq i madh sa që nuk u pa kurrë një i tillë që nga zanafilla e krijesave që i krijoi Hyji ‘deri tani’ dhe nuk do të jetë më kurrë.

²⁰Dhe, po të mos i kishte shkurtuar Zoti ato ditë, nuk do të shpëtonte njeri i gjallë. Por, për shkak të të zgjedhurve, - që ai i zgjodhi për vete, - i shkurtoi ato ditë.

²¹Nëse atëherë do t’ju thotë ndokush: ‘Qe, Mesia është këtu!’, ose ‘Është atje!’ - mos besoni!

²²Sepse do të ngriten mesi të rrejshëm e profetë të rrejshëm, do të bëjnë shenja të çuditshme për të ngashnjyer në gabim, nëse është e mundur, të zgjedhurit.

²³Ju veniani mendjen vetes: qe, jua paralajmërova të gjitha!«

²⁴»Porse, në ato ditë, pas aso vështirësie, ‘dielli do të terratiset, hëna nuk do ta lëshojë dritën e vet,

²⁵yjet do të bien prej qielli te trupat qiellor do të lëkunden.’

²⁶Atëherë do ta shohin ‘Birin e njeriut duke ardhur mbi re’ me fuqi të madhe e me lavdi.

²⁷Ai do t’i dërgojë engjëjt e vet e do t’i bashkojë të zgjedhurit (e vet) nga katër anët e botës - prej skajit të tokës deri në skaj të qiellit.«

²⁸»Mësoni prej shëmbëlltyrës së fikut: Posa i lëngëzohen gemat e qet gjethe, e dini se vera është afër.

²⁹Kështu edhe ju, kur të shihni se po ndodhin këto, dini se është afër - te dera!

³⁰Përnjëmend po ju them: nuk do të kalojë kjo brezni pa u bërë të gjitha këto.

³¹Qielli e toka do të kalojnë, e fjalët e mia nuk do të kalojnë.«

³²»Sa për atë ditë e për atë orë, s’di askush, as engjëjt në qiell, as Biri, por vetëm Ati.

³³Rrini me kujdes! Rrini zgjuar, sepse nuk e dini kur do të vijë ai çast.

³⁴Me të do të ndodhë, si me atë njeri që, duke u nisur për rrugë, e la shtëpinë e vet dhe ua la në kujdes shërbëtorëve: secilit ia caktoi punën e vet e dertarit i urdhëroi të rrijë zgjuar.

³⁵Prandaj: rrini zgjuar, sepse nuk e dini kur do të vijë i zoti i shtëpisë: në mbrëmje a në mesnatë, kur këndojnë gjelat apo në mëngjes -

³⁶që, nëse vjen papritmas, të mos ju gjejë fjetur.

³⁷Çka po ju them juve, ua them të gjithëve: rrini zgjuar!«