Jezusi para Pilatit, Jezusin e dënojnë me vdekje, etj.

¹Menjëherë në mëngjes krerët e priftërinjëve mbajtën kuvend bashkë me pleq e me skribë - mbarë Këshilli i lartë e, pasi Jezusin e lidhën, e çuan dhe ia dorëzuan Pilatit.

²Pilati e pyeti: »A je ti mbreti i judenjve?« »Ti thua!« - i përgjigji Jezusi.

³Kryepriftërinjtë e paditnin rëndë.

⁴Pilati e pyeti përsëri: »Pse s’po përgjigj asgjë? Shih se sa po të padisin!«

⁵Jezusi s’përgjigji më asgjë aq sa Pilati mbeti i habitur.

⁶Pilati për çdo të kremte të Pashkëve u lëshonte atë të burgosur që ata kërkonin.

⁷Aso here ishte në burg një njeri që quhej Barabë, i burgosur bashkë me kryengritës tjerë, të cilët në një kryengritje kishin bërë vrasje.

⁸Njerëzit u ngjitën lart e filluan të kërkojnë prej Pilatit të bëjë atë që kishte zakon të bëjë për ta.

⁹Pilati u përgjigji: »A doni t’jua lëshoj mbretin e hebrenjve?«

¹⁰Sepse e dinte mirë se kryepriftërinjtë e kishin dorëzuar prej smire.

¹¹Por kryepriftërinjtë e nxitën turmën t’ua lëshojë më mirë Barabën.

¹²Pilati foli përsëri dhe u tha: »Çka (doni) të bëj me atë që (ju thoni se) është mbreti i judenjve?«

¹³»Kryqëzoje!« - bërtitën ata përsëri.

¹⁴»Po ç’të keqe ka bërë?« - u tha Pilati. Por ata bërtitën edhe më të madhe: »Kryqëzoje!«

¹⁵Pilati, duke dashur të kënaqë turmën ua lëshoi Barabën, kurse Jezusin, pasi e frushkulloi, ua dha ta kryqëzojnë.

¹⁶Ushtarët e shtinë Jezusin brenda pallatit - d.m.th. në pretorium, dhe e bashkuan mbarë kohortën.

¹⁷E veshën me mantel të kuq dhe në krye i vunë një kurorë të gërshetuar me ferra.

¹⁸Atëherë filluan ta përshëndesin: »Të falemi, mbreti i judenjve!«

¹⁹Dhe i binin kresë me kallam, e pështynin dhe, duke u gjunjëzuar para tij, kinse e nderonin.

²⁰Pasi e vunë në lojë, ia hoqën mantelin e kuq, ia veshën petkat e tija dhe e qitën përjashta për ta kryqëzuar.

²¹Ushtarët e detyruan një kalimtar që po kthehej nga fusha, Simonin prej Cirenës, babanë e Aleksandrit e të Rufit, të mbarë kryqin e Jezusit.

²²Jezusin e çuan në një vend që quhet Golgota, që në përkthim do të thotë: ‘Vendi i Kafkës’.

²³I dhanë verë të përzier me mirrë, por ai nuk e mori.

²⁴Atëherë e kryqëzuan dhe: ‘i ndanë petkat e tija, duke qitur short’ - kujt çka t’i bjerë.

²⁵Ishte ora tre kur e kryqëzuan.

²⁶Ishte i shkruar mbishkrimi i fajit të tij: »Mbreti i judenjve.«

²⁷Bashkë me të kryqëzuan edhe dy cuba, njërin në anën e tij të djathtë, kurse tjetrin në të majtën e tij.

²⁹Kalimtarët e shanin ‘duke tundur kokën’ e thoshin: »Hej, ti që e rrënon Tempullin dhe e rindërton për tri ditë,

³⁰shpëtoje, deh, veten, zbrit prej kryqit!«

³¹Po ashtu edhe kryepriftërinjtë e skribët e vinin në lojë njëri me tjetrin dhe thoshin: »Të tjerët i shpëtoi, por veten s’mund ta shpëtojë!

³²Mesia! Mbreti i Izraelit! Le të zbresë tani nga kryqi që ta shohim e të besojmë!« E fyenin edhe ata që ishin të kryqëzuar me të.

³³Kur u bë ora gjashtë errësira e mbuloi mbarë dheun deri në orën nëntë.

³⁴Në orën nëntë Jezusi lëshoi një gjëmë të madhe: »Eloi, Eloi, lema sabahthani?«

³⁵Që përkthehet: »Hyji im, Hyji im, përse hoqe dorë prej meje?« Disa prej atyre që ishin pranë, kur e dëgjuan, thanë: »Qe, po thërret Elinë!«

³⁶Njëri prej tyre u lëshua vrap, e lagu shpuzën në ‘uthull’, e vuri në kallam, ia dha ta ‘pijë’ duke thënë: »Lëreni të shohim pale a po vjen Elia ta ulë nga kryqi!«

³⁷Jezusi lëshoi një britmë të madhe - e dha shpirt.

³⁸Atëherë kurtina e Tempullit u nda dysh prej majës e deri në fund.

³⁹Centurioni që rrinte kundruall Jezusit, kur pa se si i doli shpirti, tha: »Ky njeri paska qenë me të vërtetë Biri i Hyjit!«

⁴⁰Prej së largu vërenin edhe disa gra. Ndër to ishte: Maria Magdalenë, Maria, nëna e Jakobit të Ri dhe e Jozefit, edhe Saloma,

⁴¹të cilat e kishin përcjellë dhe i kishin shërbyer kur ishte në Galile edhe shumë tjera që me të u ngjitën në Jerusalem.

⁴²Kur u bë natë dhe, pasi ishte përgatitja - d.m.th. nata e së shtunës -

⁴³erdhi Jozefi prej Arimatesë, këshilltar i shquar e që edhe ai priste Mbretërinë e Hyjit, mori guxim dhe hyri te Pilati e ia lypi trupin e Jezusit.

⁴⁴Pilati, i habitur se kishte vdekur, thirri centurionin dhe e pyeti a kishte vdekur tashmë.

⁴⁵Si mori vesh prej centurionit, ia dhuroi trupin Jozefit.

⁴⁶Ky bleu pëlhurën, e uli nga kryqi Jezusin, e mbështolli në pëlhurë dhe e shtiu në varr të hapur në shkëmb. Pastaj rrokullisi një gur në grykë të varrit.

⁴⁷Maria Magdalenë e Maria e Jozetit shikuan ku e vunë.