Fjalime kundër skribëve e farisenjve, Vajtimi mbi Jerusalem

¹Atëherë Jezusi i tha turmës dhe nxënësve të vet:

²»Në katedrën e Moisiut ndenjën skribët e farisenjtë.

³Pra, ju duhet t’i dëgjoni e të zbatoni gjithçka t’ju thonë, por mos bëni si bëjnë ata. Ata nuk veprojnë siç thonë.

⁴Ata lidhin barrë të rënda që mezi mund të mbaren dhe ua ngarkojnë njerëzve në krahë, kurse vetë as me gisht nuk i luajnë.

⁵Mandej të gjitha veprat e veta i bëjnë me qëllim që t’i shohin njerëzit. Këndej i zgjerojnë filakteritë e veta dhe i zgjasin thekët.

⁶Në gosti dëshirojnë kryet e vendit, në sinagoga vendet e para,

⁷përshëndetjet në sheshe dhe të quhen prej njerëzve ‘rabbi’.

⁸Ju mos lejoni t’ju quajnë rabbi, sepse vetëm njëri është Mësuesi juaj, kurse ju të gjithë jeni vëllezër.

⁹Dhe përmbi tokë mos thirrni askënd Atë, sepse keni vetëm një Atë - atë që është në qiell!

¹⁰Gjithashtu mos lejoni t’ju quajnë udhëheqës - sepse keni vetëm një Udhëheqës - Krishtin!

¹¹Më i madhi ndër ju le të jetë shërbëtori juaj.

¹²Sepse, kush krenohet, do të përvuhet e kush përvuhet do të lartësohet.

¹³Vaj për ju, skribë e farisenj, shtiracakë, sepse ua mbyllni njerëzve derën e Mbretërisë së qiellit! Ju vetë nuk hyni as nuk i lini të hyjnë ata që duan të hyjnë!

¹⁵Vaj për ju, skribë e farisenj, shtiracakë, që kërkoni det e tokë për të fituar një proselit e, kur kthehet, e bëni bir të ferrit dy herë më të keq se veten!

¹⁶Vaj për ju, udhëheqës të verbër, që thoni: ‘Nëse ndokush betohet me Tempull, ai betim s’detyron, por, nëse betohet me arin e Tempullit, atëherë e detyron betimi.’

¹⁷Të marrë e të verbër! Po cili është më i madh: ari apo Tempulli, që e shenjtëron arin?

¹⁸Ju thoni edhe: ‘Kush betohet me lter s’detyron ai betim, porse, kush betohet me dhuratën që është mbi lter, atëherë e detyron betimi!’

¹⁹Qorratana! Po çka është më e madhe: dhurata apo lteri që e shenjtëron dhuratën?

²⁰Tashti kush betohet me lter, betohet me të dhe me krejt çka ka në të!

²¹Kush betohet me Tempull, betohet me të dhe me Atë që banon në të.

²²Kush betohet me Qiell, betohet me fronin e Hyjit dhe me Atë që rri në të.

²³Vaj për ju, skribë e farisenj, shtiracakë, që lani të dhjetën e mendrës, të murajës e të kimit, por lini mbas dore atë që është më e rëndësishme në Ligj: drejtësinë, mëshirën e besnikërinë! Këtë është dashur ta bëni e nga ajo e para s’është dashur të hiqni dorë.

²⁴Udhëheqës të verbër! Ju shtrydhni mushkonjën e kapërdini gamilen!

²⁵Vaj për ju, skribë e farisenj, shtiracakë, sepse pastroni anën e jashtme të gotës e të enës, ndërsa përbrenda janë plot rrëmbime e papërkormëri!

²⁶Farise i verbët! Pastro më parë brendinë e gotës, që edhe përjashta të jetë e pastër!

²⁷Vaj për ju, skribë e farisenj, shtiracakë, që u përngjani varrezave të zbardhuara me gëlqere, që duken përjashta të bukura e përbrenda janë plot eshtra të të vdekurish me gjithfarë ndyrësie.

²⁸Kështu edhe ju përjashta njerëzve u dukeni të drejtë, kurse përbrenda jeni krejt hipokrizi e padrejtësi.

²⁹Vaj për ju, skribë e farisenj, shtiracakë, që u ndërtoni profetëve varrezat e u stolisni të drejtëve monumentet

³⁰dhe thoni: ‘Të kishim jetuar në kohën e etërve tanë, nuk do të kishim bashkëpunuar me ta në vrasjen e profetëve.’

³¹Kështu ju vetë dëshmoni kundër vetvetes se jeni bijtë e atyre që vranë profetët.

³²Mirë, pra, kryeni ç’filluan baballarët tuaj!

³³Shlliga e gjarpërinj gjarpërinjsh! Si do t’i shpëtoni dënimit për ferr?!

³⁴Ja, pra, për këtë punë unë po dërgoj ndër ju profetë, dijetarë e njerëz të shkolluar. Disa prej tyre do t’i vritni, do tjerë do t’i kryqëzoni e disa tjerë do t’i frushkulloni në sinagoga tuaja e do t’i salvoni prej qyteti në qytet

³⁵që të bjerë mbi ju tërë gjaku i drejtë që u derdh mbi tokë qysh gjakut të Abelit të drejtë deri te gjaku i Zakarisë, birit të Barakisë që ju e vratë ndërmjet shenjtërores e lterit.

³⁶Për të vërtetë po ju them: të gjitha këto do të bien mbi këtë brezni.«

³⁷»Jerusalem, Jerusalem, vrastar i profetëve e që me gurë i mbyt ata që Hyji i dërgoi te ti! Sa herë desha t’i bashkoj fëmijët e tu sikurse këlluka i bashkon zogjtë e vet nën krahë… por ju nuk deshët!

³⁸Qe, shtëpia juaj po ju lihet juve - e shkretë!

³⁹Jo, po, unë po ju them: nuk do të më shihni më që tani e deri të thoni: ‘Bekuar qoftë ai që vjen në Emër të Zotit!’«