I. GJYKIMI I IZRAELIT KËRCËNIME E DËNIME, Gjykimi i Samarisë, etj.

¹Fjala e Zotit e drejtuar Mikesë nga Morasti në kohën e Joatamit, Akazit e të Ezekisë, mbretërve të Judës. Vegimet e tija në lidhje me Samarinë e me Jerusalemin.

²Dëgjoni, popuj, të gjithë! Të dëgjojë toka me gjithçka është në të! Le të dëshmojë Zoti Hyj kundër jush, Zoti nga Tempulli i tij i shenjtë!

³Sepse, ja, Zoti po del nga vendi i vet i shenjtë: Ai po zbret e po i shklet majat e tokës!

⁴Nën këmbë të tija po shkrihen malet, pëlcasin luginat porsi dylli para zjarrit, si ujërat që derdhen shpatit!

⁵E gjithë kjo për shkak të fajit të Jakobit, për shkak të mëkateve të shtëpisë së Izraelit! Cili është faji i Jakobit? Pse a nuk është Samaria? Cilat janë lartësirat e Judës? A nuk është Jerusalemi?

⁶Samarinë do ta bëjë grumbull gurësh, arë ku mbëltohet hardhia! Në luginë do t’ia rrotulloj gurët, jashtë do t’ia nxjerr themelet!

⁷Do t’ia copëtoj të gjitha truporet, të gjitha shpërblimet do t’i digjen në zjarr, do t’i rropos të gjithë idhujt e tij, sepse u mblodhën me mëditje lavirësie, prapë do të kthehen në pagë lavirësie!

⁸Për këtë do të qaj e do të ulërij, do të eci dathur e zhveshur, si çakalli do të ulëroj, porsi struci do të lëshoj gjëmë,

⁹sepse e pashërueshme është varra e tij, se arriti deri te Juda, preki dyert e popullit tim mu deri në Jerusalem!

¹⁰Mos e hapni lajmin në Get, lotë mos derdhni, në Betleafër rrotullohuni në pluhur!

¹¹Shpërnguluni, banorët e Safirit, me turp të mbuluar! S’e lëshuan vendin banorët e Saananit! Vaj e gjëmë në Betesel, në të më nuk do të banoni!

¹²Me të drejtë ia kanë frikën të mirës banorët e Marotit sepse prej Zotit zbriti fatkeqësia në derën e Jerusalemit!

¹³Mbërtheni në karroca kuajt, o banorët e Lakisit! Ky qe fillimi i mëkatit të bijës së Sionit, se në ty u gjetën fajet e Izraelit!

¹⁴Prandaj do t’ia japësh letërshkurorëzimin Moresetgetit. Pallatet e Akxibit do të jenë gënjim për mbretër të Izraelit.

¹⁵Edhe një pushtues do ta dërgoj ty, o banuese e Maresës! Deri në Odolë do të arrijë nderi i Izraelit!

¹⁶Shkuli flokët edhe qethu për fëmijët e kënaqësisë sate! Shoge kokën si shqiponja kryeshogtë, se po të çohen fëmijët në skllavëri.