II. PREMTIME TË BËRA SIONIT, Mbretëria e ardhshme e Zotit në Sion, etj.

¹E do të ndodhë në kohë - që do të vijnë: Mali i Shtëpisë së Zotit do të ngallitë mbi majë të maleve, do të lartësohet përmbi kodra! Atëherë tek ai do të ngarendin popujt,

²do të shkojnë me nxitim shumë popuj e do të thonë: »Ejani të ngjitemi në Malin e Zotit, në Shtëpinë e Hyjit të Jakobit, për të na i mësuar udhët e veta që t’i ndjekim shtigjet e tija!« Sepse Ligji vjen nga Sioni, fjala e Zotit nga Jerusalemi.

³Ai do të gjykojë ndërmjet shumë popujve, do t’i shqyrtojë popujt e fuqishëm deri në vende më të largta. Shpatat e veta do t’i kthejnë në palla, në drapërinj heshtat e veta. Një popull kundër tjetri shpatën s’do ta nxjerrë, s’do ta mësojnë më mjeshtrinë e luftimit!

⁴Secili do të pushojë nën hardhinë e vet, nën hijen e fikut të vet: askush nuk do t’u shtjerë më frikë, sepse kështu ka thënë goja e Zotit të Ushtrive.

⁵Sepse të gjithë popujt ecin, secili në emër të zotit të vet, kurse ne ecim në emër të Zotit, Hyjit tonë tash e përgjithmonë e jetës!

⁶»Po atë ditë - është fjala e Zotit - do ta bashkoj çalamanën, edhe atë që e dëbova, do ta sjell, po edhe atë që e ndëshkova.

⁷Me grigjë tash të çalë do të përftoj Tepricën, popull të fortë me atë që hoq aq keq!« Përmbi ta do të sundojë Zoti në Malin Sion tash e përgjithmonë e jetës!

⁸E ti, o Kulla e Grigjës, ti, Kodra e Bijës së Sionit, te ti do të vijë, do të arrijë pavarësia e dikurshme, mbretëria e bi’së së Jerusalemit.

⁹Përse tash lëshon klithma të mëdha? Pse, a mbret në ty nuk ka, a mbaroi këshilltari yt, që të pushtoi dhembja si dhembjet e lindëses?

¹⁰Vuaj e mundohu porsi ajo që lind, Bija e Sionit, se të duhet ta lëshosh qytetin e të qëndrosh në fushë të larë, duhet të shkosh në Babilon! Atje do të fitosh çlirimin, atje Zoti do të të shpërblejë prej dorës së armiqve të tu.

¹¹E tash, shumë kombe janë bashkuar kundër teje. Ato thonë: »Të përdhunohet, mbi Sionin të kënaqet syri ynë!«

¹²Por ata s’janë në gjendje të njohin sendërgjimet e Tenzot, s’e kuptuan këshillin e tij se i bashkoi si dorësa në lëmë!

¹³Çohu e shij, Bija e Sionit, brirët e tu do t’i bëj të hekurt, thundrat e tua prej tumbakut: do të shtypësh popuj të panumërt! Prenë e tyre do t’ia kushtosh Zotit, kamjen e tyre Zotit të mbarë tokës!

¹⁴Tash gërvishtu, o bija e vragës! Sepse të ngujuar jemi në rrethim; me thupër mollëzën godisin të gjykatësit të Izraelit.