Ngadhënjyesi i ardhshëm i Asyrit, Roli i ardhshëm i Tepricës ndër kombe, etj.

¹E ti, o Betlehem - Efratë, i vogël ndër qytetet princërore e Judës, prej teje do të më dalë ai që do ta sundojë Izraelin. Zanafilla e tij prej kohëve të hershme, prej ditëve të amshimit.

²Prandaj Hyji do t’i dorëzojë derisa të lindë ajo që ka për të lindur. Atëherë Teprica e vëllezërve të tij do të kthehet ndër bijtë e Izraelit.

³Ai do të ngritet, do të udhëheqë me fuqinë e Zotit, me madhërinë e emrit të Zotit Hyjit të vet. Do të banojnë në qetësi, sepse Ai do të jetë i madh skaj më skaj të vendit:

⁴e Ai - ai vetë do të jetë paqja!

⁵Do ta sundojnë me shpatë dheun e Asyrit e me heshta tokën e Nemrodit. Ai do të na shpëtojë nga Asyri, kur të vijë në vendin tonë, nëse i shklet kufijtë tanë.

⁶Atëherë do të jetë Teprica e Jakobit në mes të popujve të panumërt porsi vesa që vjen prej Zotit, porsi shiu që bie mbi bar, që asgjë s’pret prej njeriut, s’shpreson gjë prej bijve të njerëzve.

⁷Atëherë do të jetë Teprica e Jakobit, në mes të popujve të panumërt, si luani mes kafshëve të pyllit, si luanthi mes grigjave të dhenve, që, kur bie, shklet e kap, s’gjendet ai që mund të shpëtojë.

⁸Do të lartësohet dora jote përmbi armiqtë e tu e do të zhbihen të gjithë kundërshtarët e tu.

⁹Ja, se çfarë do të ndodhë atë ditë - është fjala e Zotit - Do t’i heq prej mesit tënd kuajt e tu, do t’i shpërndaj karrocat e tua,

¹⁰do t’i shkatërroj qytetet e vendit tënd, do t’i rrafshoj kalatë e tua!

¹¹Do t’i heq prej dorës shortitë, nuk do të ketë më në ty shortarë.

¹²Do të bëj të zhduken gdhendjet e tua gurngulurit nga mesi yt: nuk ke më për të adhuruar veprat e duarve të tua!

¹³Do t’i shkul banirët e tu do t’i thërmoj idhujt e tu.

¹⁴Me felgrim e me furi do t’u ahmerrem të gjitha kombeve që nuk dëgjuan!«